ৰেড হৰ্ন ডিভিজনৰ চিৰাঙত নিয়োজিত সেনা গোটটোৱে নিচিমা অনাথ আশ্ৰমলৈ আচবাব সামগ্ৰী আৰু খোৱাপানীৰ সুবিধা আগবঢ়াইছে। অভিযান সদ্ভাৱনাৰ অধীনত সেনা গোটটোৱে অনাথ আশ্ৰমলৈকে এই সুবিধাখিনি আগবঢ়ায়। অনাথ আশ্ৰমখনলৈ সেনা গোটটোৱে খোৱা মেজ, চকী, তুলী আৰু খোৱা পানীৰ সুবিধা আগবঢ়ায়। শিশু দিৱস উদযাপনৰ সৈতে সংগতি ৰাখি ১৪ নৱেম্বৰ বুধবাৰে নিচিমা অনাথ আশ্ৰমলৈ সেনা গোটটোৱে ৰিভাৰ্ছ অছম’ছিছ ব্যৱস্থাৰে বিশুদ্ধিকৃত (RO water purification system) খোৱা পানীৰ সুবিধা প্ৰদান কৰে।
উল্লেখ্য যে নিচিমা অনাথ আশ্ৰমত ১৫জন ল’ৰা আৰু ১০জনী ছোৱালীয়ে বাস কৰে। সেনা গোটটোৱে প্ৰদান কৰা এই সুবিধাই পিতৃ-মাতৃ আৰু আপোনজনৰ স্নেহৰ উমৰ পৰা বঞ্চিত এই শিশুসকলক যথেষ্ট উপকৃত কৰিব। অনাথ আশ্ৰম কৰ্তৃপক্ষই ভাৰতীয় সেনা বাহিনীলৈ আন্তৰিক কৃতজ্ঞতা জ্ঞাপন কৰে। জনসাধাৰণৰ সৈতে সম্পৰ্ক উন্নীত কৰাৰ বাবে ভাৰতীয় সেনা বাহিনীয়ে প্ৰৱৰ্তন কৰা অভিযান সদ্ভাৱনাৰ অধীনত এই সহায়তা উদ্যোগ গ্ৰহণ কৰা হৈছে।
ভাৰতীয় সেনা বাহিনীয়ে ভিতৰুৱা এলেকাসমূহত বাস কৰা জনসাধাৰণৰ জীৱনধাৰণৰ মান উন্নীত কৰাৰ বাবে গ্ৰহণ কৰা এই পদক্ষেপক স্থানীয় জনসাধাৰণে আদৰণি জনাইছে।
