উত্তৰ-পূবৰ ৰাজ্যসমূহৰ ছাত্ৰ সংগঠনসমূহৰ সন্মিলিত ছাত্ৰ সংগঠন উত্তৰ-পূব ছাত্ৰ সংগঠন (নেছ)এ মঙলবাৰে গুৱাহাটীত কেন্দ্ৰই গৃহীত কৰিবলৈ বিচৰা নাগৰিকত্ব সংশোধনী বিধেয়ক ২০১৬’ৰ বিৰুদ্ধে প্ৰতিবাদ সাৱ্যস্ত কৰে।
সংগঠনটোৰ নেতাসকলে লগতে বিধেয়কখন বাতিল নকৰালৈকে প্ৰতিবাদ অব্যাহত থাকিব বুলি কয়।
নেছ’ৰ সাধাৰণ সম্পাদক চিনাম প্ৰকাশে নৰ্থইষ্ট নাওৰ আগত কয়, ‘’ সমগ্ৰ উত্তৰ-পূৰ্বাঞ্চলেই বিধেয়কখনৰ বিৰোধিতা কৰিছে। আমি সকলোৱে জানো যে উত্তৰ-পূৰ্বাঞ্চল অবৈধ অনুপ্ৰৱেশকাৰীৰে ভৰি পৰিছে। আমি এটা বাৰ্তা দিব খুজিছো যে উত্তৰ-পূৰ্বাঞ্চল বিদেশীৰ চৰণীয়া পথাৰ নহয়।‘’
কেন্দ্ৰৰ বিজেপি চৰকাৰক সমালোচনা কৰি প্ৰকাশে কয়, ‘’ এইটো স্প,্ট যে বিজেপিয়ে দুমুখীয়া নীতি গ্ৰহণ কৰিছে। বিজেপিৰ ৰাষ্ট্ৰীয় সভাপতি অমিত শ্বাহে এপিনে কৈছে এন আৰ চি হৈছে অসম চুক্তিৰ আত্মা আৰু আনহাতে ই জাতিধ্বংসী নাগৰিকত্ব সংশোধনী বিধেয়ক ২০১৬’ ৰূপায়ন কৰিব বিচাৰিছে। আমি বিজেপিৰ দুমুখীয়া নীতি সহ্য নকৰো। আমি অবৈধ বিদেশীৰ বোজা ল’ব নোৱাৰো।‘’
‘’ৰাজপথত শ্ল’গান দি চিঞৰাটো অৰ্থহীন’’ বুলি দিয়া বিজেপিৰ ৰাজ্যিক মুখপাত্ৰ ৰূপম গোস্বামীৰ বিবৃতিক সমালোচনা কৰি প্ৰকাশে কয় যে ‘’ তেওঁৰ পৰা এনেধৰণৰ কথা শুনিবলগীয়া হোৱাটো লজ্জাজনক। ৰাজ্যখনৰ খিলঞ্জীয়া লোকসকল বিজেপিৰ অবৈধ অনুপ্ৰৱেশকাৰীক আমন্ত্ৰণ কৰাৰ ষড়যন্ত্ৰৰ বাবে সংকটত পৰিছে। সেয়েহে জাতিৰ পৰিচয় সুৰক্ষিত কৰাৰ বাবে প্ৰতিবাদ কৰিবলৈ ৰাজপথলৈ ওলাই আহিবলগীয়া হৈছে।‘’
সদৌ অসম ছাত্ৰ সন্থাৰ উপদেষ্টা ড০ সমুজ্জ্বল কুমাৰ ভট্টাচাৰ্যই অভিযোগ কৰে যে যুটীয়া সংসদীয়া সমিতিৰ শুনানি আছিল অসম্পূৰ্ণ। ভট্টাচাৰ্যই প্ৰশ্ন কৰে, ‘’ শুনানি সম্পূৰ্ণ নোহোৱাকৈ কেনেকৈ এখন বিধেয়ক গৃহীত হ’ব পাৰে?’’
ভট্টাচাৰ্যই লগতে অভিযোগ কৰি কয়, ‘’ কেন্দ্ৰই উত্তৰ-পূৰ্বাঞ্চলত শান্তি-সম্প্ৰীতি বৰ্তি থকাটো নিবিচাৰ। ই নাগৰিকত্ব সংশোধনী বিধেয়ক আনি হিন্দু বাংলাদেশীক সংস্থাপিত কৰিব খোজে। আমাৰ ওপৰত বিধেয়কখন জাপি নিদিব।‘’
‘’ আমি কেন্দ্ৰৰ লগতে অসম চৰকাৰকো বিধেয়কখন সন্দৰ্ভত আকৌ এবাৰ সকীয়াই দিব বিচাৰিছো। অসমৰ মুখ্য মন্ত্ৰী সৰ্বানন্দ সোণৱালৰ নীৰৱতাই কাম নিদিয়ে। তেওঁ তেওঁৰ নীৰৱতা ভংগ কৰিব লাগে,’’-ভট্টাচাৰ্যই কয়।
ভট্টাচাৰ্যই লগতে কয় যে ছাত্ৰ সংগঠনটোৱে বিধেয়কখনৰ উপৰি পাৰ্ছপ’ৰ্ট এন্ট্ৰি ইন টু ইণ্ডিয়া ২০১৫’, ফৰেইনাৰছ এমেণ্ডমেন্ট বিল আৰু দীৰ্গকালী ভিছাৰো বিৰোধিতা কৰে।
উপদেষ্টা ভট্টাচাৰ্যই লগতে জানিবলৈ দিয়ে যে উত্তৰ পূৰ্বাঞ্চলৰ ছাত্ৰ সংগঠনটোৱে বিধেয়কখন বাতিলৰ দাবীত উত্তৰ-পূৰ্বাঞ্চলৰ ৰাজধানী চহৰসমূহত প্ৰতিবাদ সাৱ্যস্ত কৰিব।
আজি গুৱাহাটী ক্লাৱত অনুষ্ঠিত প্ৰতিবাদী কাৰ্যসূচীত উত্তৰ পূৰ্বাঞ্চলৰ ছাত্ৰসকলে সমবেত হৈ বিধেয়কখন বাতিলৰ দাবীত কেন্দ্ৰীয় চৰকাৰৰ বিৰুদ্ধে শ্ল’গান দি উত্তাল প্ৰতিবাদ সাৱ্যস্ত কৰে।
