বৃহস্পতিবাৰৰ দিনটো বছৰটোৰ আটাইতকৈ ঠাণ্ডা দিন হিচাপে পৰিগণিত হৈছে কাঠমাণ্ডু। নিম্নতম তাপমাত্ৰা ১.৫ ডিগ্ৰী চেলচিয়াছলৈ নমা কাঠমাণ্ডু উপত্যকাত জনসাধাৰণে বৃহস্পতিবাৰে বছৰটোৰ এতিয়ালৈকে আটাইতকৈ ঠাণ্ডা দিনটোৰ অভিজ্ঞতা লাভ কৰিলে। কাঠমাণ্ডু প’ষ্টত এই বাতৰি প্ৰকাশ পাইছে।
বুধবাৰে ৰাতিপুৱা কাঠমাণ্ডুৰ তাপমাত্ৰা ২.২ ডিগ্ৰী চেলচিয়াছলৈ নামিছিল। ইয়াৰ আগেয়ে যোৱা ১৬ ডিচেম্বৰত কাঠমাণ্ডু উপত্যকাৰ নিম্নতম তাপমাত্ৰা ২.৮ ডিগ্ৰী চেলচিয়াছলৈ নামিছিল।
বতৰ বিজ্ঞান কেন্দ্ৰৰ বতৰ বিজ্ঞানী বৰুণ পড়ুৱেলে জনোৱা অনুসৰি তাপমাত্ৰাৰ এনে নিম্নগামিতা শীতকালত তেনেই স্বাভাৱিক।
‘’ আমি শীতকালৰ মাজভাগত আহি উপস্থিত হৈছো। ডিচেম্বৰৰ ১৫ তাৰিখৰ পৰা ১৫ জানুৱাৰিলৈকে এই সময়ছোৱাত তাপমাত্ৰাৰ এনে নিম্নগামীতা সাধাৰণতে আশা কৰিব পাৰি,’’-পডুৱেলে কয়। ‘’ হিমালয় অঞ্চলৰ মাজেৰে অহা উত্তৰ-পশ্চিমৰ পৰা বলা বতাহৰ ফলত তাপমাত্ৰা এনেদৰে নিম্নগামী হৈ পৰে,’’-তেওঁ কয়।
‘’ৰাতিটোৰ ভিতৰতে ভূমিভাগ ঠাণ্ডা হৈ পৰে। শীতকালি এয়া দীঘলীয়া সময়ৰ বাবে হয়। ঠাণ্ডা ভূমিভাগে ৰাতিপুৱাৰ ভাগত কুঁৱলীৰ সৃষ্টি কৰে। অৱশ্যে, আকাশ ফৰকাল হৈ অহাৰ লগে লগে কুঁৱলী আঁতৰি যায়,’’-পডুৱেলে জনায়।
বতৰ বিজ্ঞান কেন্দ্ৰৰ বুধবাৰৰ ৰাতিপুৱাৰ বাতৰি মতে দেশখনৰ বিভিন্ন স্থানত তাপমাত্ৰা নিম্নগামী হৈ পৰিছে।
ধাৰাবাহিক ডাঁঠ কুঁৱলীৰ বাবে দক্ষিণাঞ্চলৰ সমতলত স্বাভাৱিক জীৱন যাত্ৰা ব্যহত হৈ পৰিছে। ধনুষা জিলাৰ স্থানীয় কৰ্তৃপক্ষই তাপমাত্ৰাৰ নিম্নগামীতাৰ ফলত হোৱা শীতপ্ৰবাহৰ বাবে সকলো চৰকাৰী বিদ্যালয় বন্ধ ৰখাৰ সিদ্ধান্ত গ্ৰহণ কৰিছে।
কুঁৱলীৰ বাবে জনসাধাৰণে তেওঁলোকৰ দৈনন্দিন জীৱন পলমকৈ আৰম্ভ কৰিবলগীয়া হৈছে। কম পোহৰৰ বাবে যান বাহনৰ চলাচল স্থবিৰ হৈ পৰিছে। জিলা শিক্ষা বিষয়া য়াম বাহাদূৰ খাড়কাই কয় যে যদিও শীতৰ বন্ধ জিলাখনত জানুৱাৰিৰ মাজভাগত আৰম্ভ হয়, কৰ্তৃপক্ষই অতিপাত ঠাণ্ডাৰ বাবে স্কুলসমূহ বন্ধ ৰখাৰ সিদ্ধান্ত গ্ৰহণ কৰিছে।
বতৰ বিজ্ঞান কেন্দ্ৰই আনহাতে কৈছে যে তৰাই অঞ্চলত চলি থকা শীতপ্ৰবাহ ঠাণ্ডা বতাহৰ বাবে নহয়, কিন্তু ঠাণ্ডা গভাৰ বতাহৰ বাবেহে আৰু সেয়া আবেলিৰ পৰত নোহোৱা হৈ পৰে।
‘’তৰাইত দেখা যোৱা কুঁৱলী ভাৰতীয় সীমান্ত ৰাজ্য উত্তৰ প্ৰদেশ আৰু বিহাৰৰ দৰে একে। উলম্ব প্ৰবাহৰ আৰু ভাৰতীয় দিশৰ পৰা সোমাই অহা তৰাইৰ গভীৰ কুঁৱলীৰ আচ্ছাদন হৈছে তৰল কুঁৱলী,’’- পডুৱেলে কয়।
শীত প্ৰবাহৰ ক্ষেত্ৰত এনে কুঁৱলী কমেও ৪৮ ঘন্টা থাকে আৰু লাহে লাহে কমি আহে।
