গুৱাহাটী বিশ্ববিদ্যালয়ৰ যোগাযোগ আৰু সাংবাদিকতা বিভাগৰ ছাত্ৰ-ছাত্ৰীসকলে অহা ২৯ আৰু ৩০ নৱেম্বৰত আয়োজন কৰিছে “জোনাকী” চলচ্চিত্ৰ মহোৎসৱ।
“অসমকে ধৰি উত্তৰ পূৰ্বাঞ্চলৰ আঞ্চলিক ভাষাৰ চলচ্চিত্ৰক মঞ্চ প্ৰদানৰ জৰিয়তে শৈক্ষিক আৰু সামাজিক প্ৰগতিৰ যাত্ৰাক এক নতুন মাত্ৰা প্ৰদান কৰাটো এই মহোৎসৱৰ মূলমন্ত্র। প্ৰদৰ্শনীৰ লগতে ২৯ নৱেম্বৰত “চলচ্চিত্ৰ নিৰ্মাণ” আৰু ৩০ নৱেম্বৰত “চিত্ৰনাট্য লিখন” বিষয়ক দুটা কৰ্মশালাৰো আয়োজন কৰা হৈছে,” মঙলবাৰে গুৱাহাটী প্ৰে’ছ ক্লাবত সংবাদমেলযোগে জনাই আয়োজকসকলে।
অসমীয়া, বড়ো, ৰাভা, মিছিং, বাংলা, নাগামিজ আৰু মণিপুৰী ভাষাৰ মুঠ ১৩খন চলচ্চিত্ৰ উৎসৱটোত প্ৰদৰ্শিত হ’ব। বিশ্ববিদ্যালয়ৰ ফণীধৰ দত্ত আৰু অসম আৰ্হিৰ প্ৰেক্ষাগৃহত চিনেমাসমূহ প্ৰদৰ্শিত হ’ব। ৰাইজক মহোৎসৱত অংশগ্ৰহণৰ বাবে আহ্বান জনাইছে বিভাগটোৰ মুৰব্বী অংকুৰণ দত্ত, বিভাগীয় প্ৰতিনিধি পলাশ জ্যোতি বৰা আৰু “জোনাকী”ৰ সমন্বয়ক সুব্ৰত দত্তই।
কাংবা লাভজয়ৰদ্বাৰা পৰিচালিত মণিপুৰী চিনেমা “My Father’s Letter” প্ৰদৰ্শনেৰে উৎসৱটো আৰম্ভ হ’ব। প্ৰথম দিনা প্ৰদৰ্শিত হ’ব লগা বাকী চিনে’মাসমূহ হ’ল– চাংগে দৰ্জী থংদক পৰিচালিত ২০১৩ চনত ৰাষ্ট্ৰীয় বঁটা প্ৰাপ্ত অৰুণাচলী চিনেমা “Crossing Bridges”, কংকণ ডেকাৰ অসমীয়া চিনেমা “বিউটিফুল লাইভছ”, ৰীমা বৰাৰ অসমীয়া চিনেমা “বকুল”, সুৰজ দুৱৰা ৰাভা ভাষাত ৰাষ্ট্ৰীয় বঁটা প্ৰাপ্ত “অৰং- Strangers In The Mist” আৰু ভাস্কৰজ্যোতি মহন্তৰ ২০১৩ চনত সংগীত পৰিচালক শিতানত ৰাষ্ট্ৰীয় বঁটা লাভ কৰা “যুগদ্ৰষ্টা”।
মহোৎসৱৰ দ্বিতীয় দিনা প্ৰদৰ্শিত হ’ব ববী শৰ্মা বৰুৱা পৰিচালিত “সোণাৰ বৰণ পাখি”, টাইকুমজুক আয়েৰৰ নাগামিজ চলচিত্ৰ “Nana- A Tale Of Us”, দীপ চৌধুৰীৰ “অলিফা”, ধ্ৰুৱ বৰদলৈৰ “দূৰণিৰ নিৰলা পঁজা”, ভদা খেৰকটাৰীৰ বড়ো চলচ্চিত্ৰ “চিলিংখাৰ” আৰু নাৰায়ণ ছিল পৰিচালিত “লী-লেন”। ঝুলন কৃষ্ণ মহন্ত পৰিচালিত অসমীয়া চলচ্চিত্ৰ “নদী মাথোঁ বয়” প্ৰদৰ্শনেৰে মহোৎসৱৰ সামৰণি পেলোৱা হ’ব।
মহোৎসৱটোত বিশিষ্ট অতিথি হিচাপে শিল্পী জুবিন গাৰ্গ, পৰিচালক ৰাজেশ ভূঞা, জ্যোতি চিত্ৰবনৰ অধ্যক্ষ পৱিত্ৰ মাৰ্ঘেৰিটা, প্ৰযোজক তথা ফেশ্বন ডিজাইনাৰ গৰিমা শইকীয়া গাৰ্গ, চলচ্চিত্ৰ সমালোচক মনোজ বৰপূজাৰী, বাদ্যযন্ত্রী ৰাজা বৰুৱা, অভিনেত্ৰী জেৰিফা ৱাহিদ, অমৃতা গগৈ, ডা: জাহানাৰা বেগম, পৰিচালক কেনি বসুমতাৰী, ধ্ৰুৱজ্যোতি বৰদলৈ, দীপ চৌধুৰী, কংকন ডেকা আৰু ঝুলন কৃষ্ণ মহন্ত উপস্থিত থাকিব। অনুষ্ঠানটোত সভাপতিত্ব কৰিব বিশ্ববিদ্যালয়খনৰ উপাচাৰ্য্য মৃদুল হাজৰিকাই, পঞ্জীয়ক সুৰেশ কুমাৰ নাথে আগবঢ়াব আদৰণি ভাষণ।
৫০ বছৰ পাৰ হোৱা বিভাগটোৱে ইয়াৰ পূৰ্বে আন্তঃৰাষ্ট্ৰীয় আলোচনাচক্ৰ আৰু ৰাষ্ট্ৰীয় বিজ্ঞান চলচ্চিত্ৰ মহোৎসৱো অনুষ্ঠিত কৰিছিল।
