যোৰহাট জিলাৰ টীয়ক থানাৰ অন্তৰ্গত জাঁজী হাঁহচৰা অঞ্চলত যোৱা নিশা এটা দুৰ্বৃত্তৰ দলে গৃহস্থক গুলীওৱাৰ ভাবুকিৰে এজনী গাই গৰু লৈ যোৱা ঘটনাই অঞ্চলটোত চাঞ্চল্যৰ সৃষ্টি কৰিছে। জানিব পৰামতে যোৱা নিশা প্ৰায় ১:১৫ বজাত হাঁহচৰা কোঁৱৰ গাঁৱৰ বৈচাহাবি পথৰ কাষৰ পোলেন ফুকনৰ গোহালিৰ পৰা এখন বগা ৰঙৰ ইণ্ডিকা গাড়ীত অহা এটা গৰু চোৰৰ দলে এজনী গাই গৰু চুৰি কৰি নিয়ে।
গৰুৰ মাত শুনি পোলেন ফুকন আৰু পত্নী শোৱাৰ পৰা উঠি আহি পদুলিত এখন বগা ৰঙৰ ইণ্ডিকা কাৰ এখনত গাইগৰু জনী উঠোৱা প্ৰত্যক্ষ কৰে। গৃহস্থ পোলেন ফুকনে খেদা মাৰি যোৱাত এটা দুৰ্বৃত্তই গুলীওৱাৰ ভাবুকি দিয়ে আৰু গৰু সহ গাড়ীখন হাঁহচৰাৰ ৩৭ নং ৰাষ্ট্ৰীয় ঘাই পথেদি যোৰহাটৰ দিশে উধাও হয়।
উল্লেখযোগ্য যে ইয়াৰ পূৰ্বেও অঞ্চলটোত গৰুচোৰৰ ঘটনা সংঘটিত হৈছিল যদিও এইবাৰ গৰুচোৰৰ দলে হাতত মাৰণাস্ত্ৰ লৈ গৰুচোৰ কৰিবলৈ অহাত শংকিত হৈ পৰিছে অঞ্চল বাসী। ইফালে অঞ্চলটোত আৰক্ষীৰ টহলদাৰী পহৰা ব্যৱস্থা থকাৰ পাছতো গৰু চোৰৰ দলে মাৰণাস্ত্ৰ দেখুৱাই গৰু চোৰ কৰি নিয়া ঘটনাত ৰহস্যৰ গোন্ধ পাইছে স্থানীয় ৰাইজে।
আনহাতে একে নিশাই হাঁহচৰা কমাৰ গাঁৱৰ উপেন বৰাৰ ঘৰৰ পৰাও দুৰ্বৃত্তই এহাল বলধ গৰু চুৰি কৰি নিয়ে। দুয়োটা চুৰি কাণ্ড একেটা দুৰ্বৃত্তৰ দলে সংঘটিত কৰা বুলি সন্দেহ কৰা হৈছে। ইতিমধ্যে ঘটনা সন্দৰ্ভত স্থানীয় আৰক্ষীক অভিযোগ দিয়া বুলি জানিব পৰা গৈছে।
