অসম ফ’ৰেনছিক বিজ্ঞানাগাৰত দীৰ্ঘদিন ধৰি বহু পদ খালী হৈ থকাৰ বাবে ৰাজ্যখনত সংঘটিত হোৱা অপৰাধমূলক ঘটনাসমূহৰ ফ’ৰেনছিক পৰীক্ষা-নিৰীক্ষা কৰাৰ ক্ষেত্ৰত সমস্যাৰ সৃষ্টি হৈ আহিছে। আনকি অসম ফৰেনছিক বিজ্ঞানাগাৰে বিষয়া-কৰ্মচাৰীৰ অভাৱত তদন্তৰ প্ৰতিবেদনো সময়মতে দাখিল কৰিব নোৱাৰে।
ইপিনে, অসম চৰকাৰে অসম ফ’ৰেনছিক বিজ্ঞানাগাৰত খালী হৈ থকা পদসমূহ পূৰণ নকৰাৰ বাবে উচ্চতম ন্যায়ালয়ৰ ৰোষত পৰিছে। ৰাজ্য চৰকাৰে পদসমূহ পূৰণ কৰাৰ ক্ষেত্ৰত কেন্দ্ৰীয় চৰকাৰক সহযোগ নকৰাৰ বাবে ন্যায়ালয়খনে ৰাজ্য চৰকাৰখনক ৫০,০০০ টকা জৰিমনাও বিহিছে।
জানিব পৰা মতে অসমকে ধৰি দেশৰ আন ছখন ৰাজ্যক ন্যায়ালয়খনৰ ন্যায়াধীশ মদন বি লুকুৰৰ পীঠে ফ’ৰেনছিক বিজ্ঞানাগাৰসমূহত খালী হৈ থকা পদসমূহ পূৰণ নকৰাৰ বাবে কঠোৰভাৱে ভৰ্ৎসনা কৰে। তদুপৰি, ন্যায়ালয়ে খালী পদসমূহ শীঘ্ৰে পূৰণ কৰিবলৈ নিৰ্দেশ দিছে।
বৰ্তমান তথ্য অনুসৰি অসমৰ ফ’ৰেনছিক বিজ্ঞানাগাৰত প্ৰায় ৪০ শতাংশ পদ খালী হৈ পৰি আছে। সেইদৰে কৰ্ণাটক, ৰাজস্থান,মহাৰাষ্ট্ৰৰ ফ’ৰেনছিক বিজ্ঞানাগাৰসমূহত প্ৰায় ৫০ শতাংশ পদ খালী হৈ আছে। এইক্ষেত্ৰত উত্তৰ প্ৰদেশত ফ’ৰেনছিক বিজ্ঞানাগাৰত প্ৰায় ৮০ শতাংশ পদ খালী হৈ আছে।
এনেদৰে খালী হৈ পৰি থকা পদসমূহ পূৰণৰ ক্ষেত্ৰত ৰাজ্য চৰকাৰে সহযোগ কৰা নাই বুলি অতিৰিক্ত ছলিচিটৰ জেনেৰেল আমান লেখিয়ে আদালতত ব্যক্ত কৰে। ৰাজ্য চৰকাৰৰ এনে অৱহেলাৰ বাবে অপৰাধমূলক গোচৰসমূহ মীমাংসাৰ ক্ষেত্ৰত সমস্যাৰ সৃষ্টি হোৱা বুলিও লেখিয়ে লগতে সদৰী কৰে।
