নগা বিদ্ৰোহী সংগঠন এনএছচিএনৰ বিচৰণভূমি হিচাপে পৰিচিত এলেকা হৈছে অৰুণাচল প্ৰদেশৰ লংডিং জিলা। এই লংডিং জিলাত আজি ৬ ডিচেম্বৰ বৃহস্পতিবাৰে অসম ৰাইফলছ আৰু এনএছচিএনৰ (আইএম) মাজত হোৱা সংৰ্ঘষত এন এছ চি এনৰ(আই এম)ৰ দুজন দুৰ্ধষ সদস্য নিহত হয়।
ঘটনা সন্দৰ্ভত জানিব পৰা মতে লংডিঙৰ মুক্তৱা নামৰ অঞ্চলত এনএছচিএনৰ (আইএম)ৰ এটা বৃহৎ দলে বাহৰ পতাৰ তথ্য গোপন সূত্ৰে লাভ কৰে ১৬নং আছাম ৰাইফলছে। এই তথ্যৰ ভিত্তিত আজি পুৱাৰে পৰা ১৬নং অসম ৰাইফলছে উগ্ৰপন্থী সংগঠনটোৰ সদস্যৰ দলটোৰ বিৰুদ্ধে এটা অভিযান চলায়।
এই অভিযান কালত দুয়োপক্ষৰ মাজত তুমূল সংৰ্ঘষৰ সৃষ্টি হয়। অসম ৰাইফলছে পুৱাৰ ভাগতেই আইএম উগ্ৰপন্থী গোটটোৰ এজন সদস্যক গুলিয়াই হত্যা কৰে। ইপিনে বৰ্তমানলৈকে চলি থকা অভিযানত আজি বিয়লিৰ ভাগত আন এজন উগ্ৰপন্থী সদস্য সেনাৰ গুলীত নিহত হয়। নিহত উগ্ৰপন্থী দুজনৰ পৰা সেনাই অস্ত্ৰ-শস্ত্ৰ উদ্ধাৰ কৰিছে। এই সংঘৰ্ষত এনএছচিএন (আইএম) উগ্ৰপন্থীৰ কেপ্টেইন এ টাংখুল নিহত হোৱাৰ বিপৰীতে আনজন উগ্ৰপন্থীক বাতৰি লেখাৰ সময়লৈকে চিনাক্ত কৰিব পৰা হোৱা নাই।
