অহা ১২ ডিচেম্বৰত পঞ্চায়ত নিৰ্বাচনৰ ফলাফল ঘোষিত হোৱাৰ লগে লগে কোনে কোন পঞ্চায়ত কোন দলে কি অংকৰে দখল কৰে সেইটোতকৈ আন এটা কথাহে ৰাজ্যৰ ৰাজনৈতিক ক্ষেত্ৰখনত অধিক গুৰুত্বপূৰ্ণ হৈ পৰিব। কথাটো হ’ল অগপ দলটোৱে কিমান ভোট বা আসন পালে? এই প্ৰশ্নৰ ওপৰতে আগন্তুক পৰৱৰ্তী নিৰ্বাচনবোৰকে ধৰি অগপ দলটোৰ সামগ্ৰিক ৰাজনৈতিক ভৱিষ্যতৰ এটা মোটামুটি ছবি নিৰ্ভৰ কৰিব বুলি ক’ব পাৰি।
যদি অগপই আশা কৰা ধৰণৰ বা তাতকৈ ভাল ফল আনিবলৈ সক্ষম হয়, তেতিয়া মিত্ৰ দলটোৰ ওচৰত আগতকৈ বুকু ফুলাই কথা ক’ব পাৰিব বা নাগৰিকত্ব সংশোধনী বিধেয়কৰ বিৰুদ্ধে আগতকৈ বেছি দৃঢ়তা দেখুৱাব পাৰিব। যদি তেনেই হয়, সি দলটোৰ লগতে নিঃসন্দেহে অসমীয়া জনগণৰ বাবেও লাভদায়ক হ’ব।
কিন্তু এইটো প্ৰশ্নও সমানেই গুৰুত্বপূৰ্ণ যে যদি অগপই প্ৰত্যাশিত ফল নাপায়, তেতিয়া কি হ’ব? মিত্ৰ দলটোৰ আগত অগপই মূৰ দাঙি কথা ক’ব পৰা সাহসকণ ৰ’বগৈ নে? তাতকৈও গুৰুত্বপূৰ্ণ কথাটো হ’ল, খুব সম্ভৱ মন্ত্ৰী ড০ হিমন্ত বিশ্ব শৰ্মাৰ কটাক্ষৰ চোক বাঢ়ি যাব আৰু অগপ হ’ব মন্ত্ৰীজনৰ ৰুচিহীন বিদ্ৰূপবোৰৰ নৈমিত্তিক উপাদান।
মন কৰিব পাৰি যে পঞ্চায়ত নিৰ্বাচনৰ প্ৰচাৰৰ সময়ত বিজেপিৰ মন্ত্ৰী হিমন্ত বিশ্ব শৰ্মাই অগপ দলটোক উপৰ্য্যুপৰি কটাক্ষ কৰি আহিছে। আনকি কংগ্ৰেছেও অগপক সিমান চোকা সমালোচনাৰে থকাসৰকা কৰা নাই, যিমান কৰিছে মিত্ৰতাৰ চৰকাৰখনৰ মন্ত্ৰী হিমন্তই।
গতিকে এইটো সহজেই অনুমেয় যে পঞ্চায়ত নিৰ্বাচনৰ ফল অগপৰ বাবে এটা মাইলৰ খুঁটি স্বৰূপ। যদিও পঞ্চায়ত দখল কৰাটো সিমান গুৰুত্বপূৰ্ণ নহয়, এই নিৰ্বাচনৰ ফলেই দলটোৰ ৰাজনৈতিক ভৱিষ্যতৰ ছবি নিৰ্ণয় কৰিব।
যদি পঞ্চায়ত নিৰ্বাচনত অগপই সন্তোষজনক ফল এটা লাভ কৰিব নোৱাৰে, পৰৱৰ্তী নিৰ্বাচন এটাৰ জৰিয়তে পুনৰ মূৰ দাঙি নুঠালৈকে মিত্ৰ দল বিজেপিৰ ওচৰত চকু তুলি কথা ক’ব নোৱাৰিব দলটোৱে। আনহাতে যদি অভাৱনীয় ভাল ফল লাভ কৰে তেওঁলোকে লোকসভা নিৰ্বাচনৰ বাবে অকলে যুঁজাৰ টঙালি বন্ধাৰ সাহসকণো তাৰ পৰাই গোটাব পাৰে। দলৰ নেতৃত্ব দুয়োটা কথাৰ বাবে সাজু থাকিব লাগিব।
