উত্তৰ পূব কয়লা ক্ষেত্ৰ মাৰ্ঘেৰিটাৰ বিভিন্ন কলিয়ৰিত নিয়োজিত অস্থায়ী সুৰক্ষা কৰ্মীসকলক উৰ্ধতম কৰ্তৃপক্ষৰ অপসাৰণৰ নিদেৰ্শক লৈ আজি উত্তাল হয় মাৰ্ঘেৰিটা মহকুমাৰ অন্তৰ্গত টিৰাপ কলিয়ৰি৷ উল্লেখযোগ্য যে এই সুৰক্ষা কৰ্মীসকলক তাৎক্ষণিক ভাৱে চাটাই কৰি সেনা বাহিনীৰ প্ৰাক্তন জোৱানক নিয়োগ কৰাৰ নিদেৰ্শ দিছে ক’ল ইণ্ডিয়া লিমিটেড কৰ্তৃপক্ষই৷
উত্তৰ পূব কয়লা ক্ষেত্ৰৰ অন্তৰ্গত টিৰাপ কলিয়ৰি আজি প্ৰতিবাদী কাৰ্যসূচীৰে উত্তাল কৰিলে ঠিকাভিত্তিক নিয়োজিত দুই শতাধিক স্থানীয় সুৰক্ষা কৰ্মীয়ে৷ ১৯৯২ চনৰ পৰা বিভিন্ন প্ৰতিষ্ঠানৰ জৰিয়তে ৰাজহুৱা খণ্ডৰ প্ৰতিষ্ঠানটোৰ উৎপাদিত কয়লাকে ধৰি বিভিন্ন ধৰণৰ সুৰক্ষাৰ কামত জড়িত এই সকল স্থানীয় সুৰক্ষা কৰ্মীক অপসাৰণ কৰি প্ৰাক্তন সেনা বাহিনীৰ জোৱানক নিযুক্তি দিয়াৰ বাবে কলিকতাস্থিত মুখ্য কাৰ্যালয়ৰ পৰা নিদেৰ্শ দিয়াক কেন্দ্ৰ কৰিয়েই এইদৰে প্ৰতিবাদ মুখৰ হৈ পৰিছে সুৰাক্ষা কৰ্মী সকল৷
প্ৰতিবাদকাৰী সকলে প্ৰায় দুই ঘণ্টা প্ৰতিবাদেৰে টিৰাপ আৰু টিকক কলিয়ৰিৰ কাম-কাজ অচল কৰি দিয়ে৷ পাছত প্ৰতিষ্ঠানটোৰ প্ৰতিনিধিৰ সৈতে আলোচনা কৰাৰ অন্তত প্ৰতিবাদী কাৰ্যসূচী সাময়িক ভাৱে প্ৰত্যাহাৰ কৰে৷ অৱশ্যে পুনৰ এই সুৰক্ষা কৰ্মীসকলে আন্দোলন কৰাটো নিশ্চিত৷ যিহেতু বৰ্তমান এই সকল সুৰক্ষা কৰ্মীক পুনৰ কামত জড়িত হ’বলৈ দিয়া হৈছে যদিওঁ কলিকতাস্থিত মুখ্য কাৰ্যালয়ৰ পৰা অহা নিদেৰ্শ বৰ্তমান পৰ্যন্ত প্ৰত্যাহাৰ কৰা হোৱা নাই৷
