‘লিটল বয়’ নামৰ বলীউডী চলচ্চিত্ৰখন অহা বছৰৰ জানুৱাৰিৰ ১৮ তাৰিখে মুক্তি দিয়া হ’ব। এই চলচ্চিত্ৰৰ সৈতে জড়িত আছে ভালেমান নাগা কলা-কুশলী।
উল্লেখ্য যে এইখন হৈছে অৰুণাচলত চিত্ৰগ্ৰহণ কৰা প্ৰথমখন বলীউডী চলচ্চিত্ৰ। চলচ্চিত্ৰখনৰ দৃশ্যগ্ৰহণ অৰুণাচলৰ ৰাজধানী চহৰ ইটানগৰকে ধৰি জিৰ’ আদি স্থানত সম্পন্ন কৰা হৈছে।
এই চলচ্চিত্ৰখনত এটি সৰু ল’ৰাৰ জীৱন সংগ্ৰামক তুলি ধৰা হৈছে। ইয়াতে আছে ৰাজনৈতিক শক্তিয়ে অৱৰুদ্ধ কৰা এগৰাকী নিৰাপৰাধ লোকৰ জীৱনযাত্ৰাৰ কাহিনী।
চলচ্চিত্ৰখনৰ নিৰ্দেশনা ছিৰাজ হেনৰীৰ। প্ৰধান ভূমিকাসমূহত অভিনয় কৰিছে য়ুজুৱেন্দ্ৰ প্ৰতাপ সিং, ৰশ্মি মিশ্ৰ, ৰোজ লংচাৰ, চুঝো ঝোখই, শিশিৰ শৰ্মাই।
নাগা অভিনেত্ৰী ৰোজ লংচাৰে মূখ্য চৰিত্ৰত অভিনয় কৰাৰ উপৰিও চলচ্চিত্ৰখনত নাগালেণ্ডৰ চুঝো ঝোখই আৰু ঝাটুও আদি শিল্পীয়ে অভিনয় কৰিছে।
ফাইণ্ড ষ্টুডিঅ’জ আৰু য়ুমলাম আচুঙৰ সহযোগিতাত চলচ্চিত্ৰখনৰ প্ৰযোজনা টানি ফিল্মছৰ। সহ প্ৰযোজনা হৈছে ৰেবেকা চাংকিজা ছেমাৰ। সাজ-সজ্জা আৰু ষ্টাইলিং নাগালেণ্ডৰ টি লামানাৰো জমিৰৰ। চলচ্চিত্ৰখনৰ সংগীত নিৰ্দেশনা আবজুৰৰ। জি-মিউজিকে ইতিমধ্যে ৯ ডিচেম্বৰত চলচ্চিত্ৰখনৰ সংগীত মুকলি কৰি দিছে। গীতসমূহৰ গীতিকাৰ হৈছে আৰাফত মাহমুদ। ৰেবেকাই কৈছে যে তেওঁলোকৰ কঠিন পৰিশ্ৰমৰ পলত চলচ্চিত্ৰখন সমগ্ৰ ভাৰতে মুক্তি দিব পৰা যাব।
উল্লেখ্য যে ‘লিটল বয়’ক চেঞ্চৰ ব’ৰ্ডে ‘য়ু’ অৰ্থাৎ সকলোৰে বাবে উপভোগ্য প্ৰমাণপত্ৰ প্ৰদান কৰিছে।
