সদ্য ঘোষিত পঞ্চায়ত নিৰ্বাচনত নগাঁও জিলাৰ ২৯ টা জিলা পৰিষদ সমষ্টিৰ ভিতৰত বিজেপিয়ে ১২ টা জিলা পৰিষদ সমষ্টি দখল কৰি বৃহৎ দল হিচাপে পৰিগণিত হ’লেও মুখ্য মন্ত্ৰী সৰ্বানন্দ সোণোৱাল আৰু বিত্ত তথা স্বাস্থ্য মন্ত্ৰী ডঃ হিমন্ত বিশ্ব শৰ্মাৰ নিৰ্বাচনী প্ৰচাৰে জিলাখনৰ কলিয়াবৰৰ বাদে বাকী ঠাইত চমক দেখুৱাব নোৱাৰিলে।
মুখ্য মন্ত্ৰী সোণোৱালে বটদ্ৰৱা সমষ্টিৰ কপাহেৰাত চাবুকধৰা জিলা পৰিষদৰ বিজেপি প্ৰাৰ্থী অঞ্জু দাসৰ লগতে সমষ্টিটোৰ হাতীচোং, টুকটুকী আৰু বটদ্ৰৱাৰ দলীয় প্ৰাৰ্থীৰ হৈ প্ৰচাৰ চলাইছিল যদিও একমাত্ৰ হাতীচোং জিলা পৰিষদ সমষ্টিৰ বাহিৰে বাকীকেইটা জিলা পৰিষদ সমষ্টিত বিজেপি প্ৰাৰ্থীয়ে পৰাজয় বৰণ কৰিবলগীয়া হয়।
বটদ্ৰৱা সমষ্টিৰ বিধায়িকা আঙুৰলতা ডেকাৰ গৃহ জিলা পৰিষদ চাবুকধৰাত কংগ্ৰেছ প্ৰাৰ্থী মনিষা বৰদলৈৰ হাতত বিজেপি প্ৰাৰ্থী গৰাকীয়ে পৰাজয় বৰণ কৰে। ইয়াৰ বিপৰীতে টুকটুকী আৰু বটদ্ৰৱা জিলা পৰিষদ সমষ্টিত ক্ৰমে এআইয়ুডিএফৰ প্ৰাৰ্থী গোলাম ৰাব্বানী আৰু আছমিনা খাতুন বিজয়ী হয়।একমাত্ৰ হাতীচোং জিলা পৰিষদ সমষ্টিত বিজেপি প্ৰাৰ্থী সীমা ৰেখা ভঁড়ালী বিজয়ী হয়।
ইপিনে বিজেপিৰ ষ্টাৰ কেম্পেইনাৰ মন্ত্ৰী ডঃ হিমন্ত বিশ্ব শৰ্মাই হেলিকপ্টাৰৰে জিলাখনৰ কলিয়াবৰ সমষ্টিৰ লগতে বঢ়মপুৰ আৰু নগাঁৱৰ সদৰ বিধান সভা সমষ্টিত নিৰ্বাচনী প্ৰচাৰ চলাইছিল যদিও কলিয়াবৰৰ বাহিৰে বঢ়মপুৰ আৰু সদৰ বিধান সভা সমষ্টিত হিমন্ত বিশ্ব শৰ্মাৰ মেজিকে কাম নিদিলে।
মন্ত্ৰী ডঃ হিমন্ত বিশ্ব শৰ্মাই বঢ়মপুৰ বিধান সভা সমষ্টিৰ কঠিয়াতলী-কামপুৰ জিলা পৰিষদৰ এলেকাত আৰু নগাঁও সদৰ বিধান সভা সমষ্টিৰ অন্তৰ্গত পাখিমৰীয়া জিলা পৰিষদ সমষ্টিৰ এলেকাতো বিজেপিৰ দলীয় প্ৰাৰ্থীৰ হৈ নিৰ্বাচনী প্ৰচাৰ চলাইছিল যদিও দুয়োটা জিলা পৰিষদ সমষ্টিতে বিজেপি প্ৰাৰ্থী কেইজনে মুখ থেকেচা খায়।
কঠিয়াতলী-কামপুৰ জিলা পৰিষদত অগপ প্ৰাৰ্থী ঘন বৰদলৈয়ে বিজেপি প্ৰাৰ্থী ৰূপাংকৰ বৰদলৈক পৰাজিত কৰাৰ বিপৰীতে পাখিমৰীয়া জিলা পৰিষদ সমষ্টিত কংগ্ৰেছ প্ৰাৰ্থী দিপীকা শইকীয়াই বিজেপি প্ৰাৰ্থী সংগীতা ভূঞাক পৰাজিত কৰে।
সকলো ধৰণৰ নিৰ্বাচনতে ষ্টাৰ কেম্পেইনাৰৰ বিশেষ গুৰুত্ব থকা বুলিয়ে প্ৰাৰ্থী সকলে ভোটাৰক আকৰ্ষণৰ বাবে নিজ নিজ এলেকাত ষ্টাৰ কেম্পেইনাৰক বিচাৰে।
কিন্তু বিজেপিক ক্ষমতালৈ অনাত প্ৰচাৰৰ ক্ষেত্ৰত প্ৰধান ভূমিকা গ্ৰহণ কৰা ড° হিমন্ত বিশ্ব শৰ্মাৰ সাম্প্ৰতিক সময়ত ভোটাৰৰ মাজত প্ৰভাৱ কিমান প্ৰতাপী মন্ত্ৰীজনে নিৰ্বাচনী প্ৰচাৰ চলোৱা নগাঁৱৰ দুটাকৈ জিলা পৰিষদ সমষ্টিৰ এটাতো দলীয় প্ৰাৰ্থী বিজয়ী হ’বলৈ সক্ষম নোহোৱাত প্ৰশ্ন উত্থাপন হৈছে।
