আদিবাসী জনগোষ্ঠীৰ জনজাতিকৰণৰ দাবীৰ লগতে আদিবাসী জনগোষ্ঠীৰ বিভিন্ন সমস্যা সমাধানৰ দাবীত সদৌ আদিবাসী ছাত্ৰ সন্থাই অহা ২১ ডিচেম্বৰত সমগ্ৰ ৰাজ্যতে উপায়ুক্তৰ কাৰ্যালয়ৰ সন্মুখত দুঘণ্টীয়া প্ৰতিবাদী ধৰ্ণা কাৰ্যসূচী ৰূপায়ণ কৰিব।
শুকুৰবাৰে গুৱাহাটীত অনুষ্ঠিত আছাৰ কাৰ্যনিৰ্বাহক সভাত এই সিদ্ধান্ত গ্ৰহণ কৰা হয়। সংগঠনটোৱে সেইদিনা প্ৰতিবাদী কাৰ্যসূচী ৰূপায়নৰ অন্তত ৰাষ্ট্ৰপতিলৈ স্মাৰক-পত্ৰ প্ৰেৰণৰো সিদ্ধান্ত গ্ৰহণ কৰে।
আছাৰ কেন্দ্ৰীয় সমিতিৰ সভাপতি প্ৰদীপ নাগ, সাধাৰণ সম্পাদক যোচেফ মিঞ্জ আৰু কেন্দ্ৰীয় প্ৰচাৰ সম্পাদক মনচুক চাংকচাৰিকাই সংবাদ মাধ্যমলৈ প্ৰেৰণ কৰা বিবৃতি অনুসৰি শুকুৰবাৰে সংগঠনটোৱে গুৱাহাটীৰ পল্টনবজাৰস্থিত ৰাষ্ট্ৰীয় মজদুৰ কংগ্ৰেছৰ কাৰ্যালয়ৰ কেন্দ্ৰীয় সমিতিৰ সভাপতি প্ৰদীপ নাগৰ সভাপতিত্বত অনুষ্ঠিত কাৰ্যনিৰ্বাহক সভাত উক্ত প্ৰতিবাদী ধৰ্ণা কাৰ্যসূচীৰ সিদ্ধান্ত গ্ৰহণ কৰে।
সাধাৰণ সম্পাদক যোচেফ মিঞ্জে উদ্দেশ্য ব্যাখ্যা কৰা সভাখনত অহা ১৭,১৮,১৯ আৰু ২০ জানুৱাৰিত আছাৰ উদ্যোগত তিনিচুকীয়া জিলাৰ বৰডুমচাত ১৬সংখ্যক আদিবাসী মহাসভাৰ আয়োজনৰ সিদ্ধান্ত গ্ৰহণ কৰে।
দীৰ্ঘদিন ধৰি জনজাতিকৰণৰ দাবীত আন্দোলন কৰি অহা আছাই কিছুদিনৰ বিৰতিৰ পাছত পুনৰ তেওঁলোকৰ দাবীত ৰাজপথলৈ ওলাই অহাৰ সিদ্ধান্ত লৈছে। আগন্তুক লোকসভা নিৰ্বাচনৰ প্ৰতি লক্ষ্য ৰাখি বিজেপি নেতৃত্বাধীন চৰকাৰৰ ওপৰত হেচা দিয়াৰ এইটোৱে উপযুক্ত সময় হিচাপে বিবেচনা কৰিছে সংগঠনটোৱে।
