অসমত বহু ছাত্ৰ সংগঠন আছে, কিন্তু বৰ্তমান সময়ত প্ৰকৃত অৰ্থত ছাত্ৰ-ছাত্ৰীৰ মৌলিক সমস্যাসমূহৰ ক্ষেত্ৰত এনে একাংশ ছাত্ৰ-সংগঠনৰ দায়বদ্ধতাক লৈ প্ৰশ্ন উত্থাপিত হয়। কিন্তু এইক্ষেত্ৰত এক ব্যতিক্ৰমী পদক্ষেপ গ্ৰহণৰ বাবে আগবাঢ়িছে কটন বিশ্ববিদ্যালয় ছাত্ৰ একতা সভা।
বহু সময়ত ছাত্ৰ সংগঠনৰ নাম লৈ একাংশই আন বিষয়তহে অধিক গুৰুত্ব দিয়া দেখা যায়। ইয়াৰ বিপৰীতে কটন বিশ্ববিদ্যালয় ছাত্ৰ একতা সভাৰ নেতৃত্বত বিশ্ববিদ্যালয়খনৰ ছাত্ৰ-ছাত্ৰীয়ে সমগ্ৰ অসমতে এক শৈক্ষিক বিপ্লৱ গঢ়ি তোলাৰ প্ৰয়াস কৰিছে।
বৃহস্পতিবাৰে কটন বিশ্ববিদ্যালয় ছাত্ৰ একতা সভাৰ সাধাৰণ সম্পাদক প্ৰাঞ্জল কলিতাই এক বিবৃতিযোগে এই কথা জানিবলৈ দিয়ে।
বিবৃতিটোত প্ৰকাশ কৰা অনুসৰি শৈক্ষিক বিপ্লৱ গঢ়ি তোলাৰ উদ্দেশ্য লৈ বিশ্ববিদ্যালয়খনৰ ছাত্ৰ-ছাত্ৰীৰ ১০জনীয়া দল এটাই অসম ভ্ৰমণ কৰিব। অহা ২ জানুৱাৰিত দলটোৱে কটন বিশ্ববিদ্যালয়ৰ পৰা যাত্ৰা আৰম্ভ কৰি পোনপ্ৰথমে গোৱালপাৰা জিলালৈ যাব আৰু জিলাখনৰ কেইবাখনো মহাবিদ্যালয়ৰ ছাত্ৰ-ছাত্ৰীৰ সৈতে আলোচনাত মিলিত হ’ব বুলিও জানিবলৈ দিছে।
এই ভ্ৰমণত অসমৰ ইমূৰৰ পৰা সিমূৰলৈ বিভিন্ন বিদ্যালয়, মহাবিদ্যালয় আৰু বিশ্ববিদ্যালয়ৰ ছাত্ৰ-ছাত্ৰীৰ সৈতে প্ৰত্যক্ষ সম্পৰ্ক স্থাপন কৰিব বুলি ছাত্ৰ একতা সভাৰ সাধাৰণ সম্পাদক প্ৰাঞ্জল কলিতাই বিবৃতিটোত প্ৰকাশ কৰিছে।
“অসমৰ প্ৰতিখন জিলাৰ শিক্ষা প্ৰতিষ্ঠানসমূহৰ ছাত্ৰ-ছাত্ৰীৰ সমস্যাৰাজিৰ বুজ লোৱা, সেইসমূহৰ সমাধানৰ অৰ্থে ঐক্যবদ্ধ প্ৰচেষ্টা হাতত লোৱা, নাৰী শিক্ষাৰ প্ৰচাৰ, কু-সংস্কাৰৰ বিপক্ষে বৈজ্ঞানিক চিন্তাধাৰাৰ প্ৰসাৰ আৰু সজাগতাৰ সৃষ্টি, উদ্যোগী যুৱ-ছাত্ৰক উৎসাহ আৰু প্ৰেৰণা যোগোৱা আৰু দল-সংগঠনৰ গণ্ডিৰ বাহিৰত থাকি অসমৰ ছাত্ৰ সমাজৰ একত্ৰীকৰণৰ জৰিয়তে ৰাজ্যৰ শৈক্ষিক আৰু সামাজিক ক্ষেত্ৰত ভূমিকা গ্ৰহণ কৰাই এই ভ্ৰমণৰ প্ৰধান উদ্দেশ্য,” বিবৃতিটোত সাধাৰণ সম্পাদকে কয়।
ইয়াৰ উপৰিও অসমৰ ছাত্ৰ-ছাত্ৰীসকলৰ মৌলিক সমস্যা সমাধানৰ ক্ষেত্ৰত কোনো দল-সংগঠনে সৰৱ ভূমিকা গ্ৰহণ কৰা নাই বুলি বিবৃতিটোত উল্লেখ কৰি এই ক্ষেত্ৰত দল-সংগঠনৰ ঊৰ্ধ্বত থাকি ছাত্ৰ সমাজক একত্ৰিত হোৱাৰ বাবেও তেওঁ আহ্বান জনায়। লগতে ভ্ৰমণকাৰী দলটোৰ সৈতে যোগাযোগৰ বাবে ৭০৮৬২৯৭৫১০, ৮৭৪৯৮৭৬২৯৩ আৰু ৭৫৭৭০৫৫৯৩৯ ফোন কৰিব পাৰিব বুলিও বিবৃতিটোত প্ৰকাশ কৰিছে।
