জন্মৰ দিনতে গুৱাহাটীস্থিত নিজ ঘৰত “আত্মহত্যা” কৰা কংগ্ৰেছ নেতা, ব্যৱসায়ী অনুপম বৰদলৈৰ “চুইছাইদ ন’ট”ত জুবিন গাৰ্গৰ নাম থকা বুলি অসমৰ News18 Assam-Northeast নামৰ টিভি চেনেলটোৱে পৰিৱেশন কৰা বাতৰিয়ে সৃষ্টি কৰিছে তুমুল প্ৰতিক্ৰিয়াৰ।
বাতৰিটোক লৈ টিভি চেনেলটোৰ ফে’চবুক পে’জত বৃহস্পতিবাৰে শতাধিক লোকে মন্তব্য কৰিছে আৰু ৰাতি ১১.১৮ বজালৈকে এশ শতাংশ লোকেই বাতৰিটোত জুবিন গাৰ্গৰ নাম লোৱাকলৈ তীব্ৰ অসন্তুষ্টি প্ৰকাশ কৰিছে।
আত্মহত্যাকাৰী বৰদলৈৰ চিনাকী এগৰাকী ব্যক্তিৰ উদ্ধৃতিৰে “চুইছাইদ ন’ট”টোত জনপ্ৰিয় শিল্পীগৰাকীৰ লগতে এগৰাকী মহিলা ৰাজনীতিকৰ নাম আছে বুলি দাবী কৰিছে চেনেলটোৱে। বৰদলৈয়ে তীব্ৰ মানসিক হেঁচাত আত্মহত্যা কৰা বুলি দাবী কৰি ব্যক্তিগৰাকীয়ে ঘটনাটোত “ব্লেকমেইলিং” ধৰণৰ প্ৰসংগৰো ইংগিত দিছে।
বৰদলৈৰ “আত্মহত্যা”ক লৈ বুধবাৰে নৰ্থ ইষ্ট নাও-ত তদন্তকাৰী আৰক্ষীয়ে বিশেষ মন্তব্য কৰা নাছিল যদিও এখন “চিঠি” উদ্ধাৰ হোৱা বুলি সদৰী কৰিছিল আৰক্ষীয়ে।
লগতে পঢ়ক– জন্মৰ দিনতে গুৱাহাটীত ‘আত্মহত্যা’ কংগ্ৰেছ নেতাৰ
গুৱাহাটীৰ এ আই দি চিস্থিত নিজ ঘৰত বুধবাৰে “আত্মহত্যা” কৰিছিল ব্যৱসায়ী তথা কংগ্ৰেছ নেতা অনুপম বৰদলৈয়ে।
নিজ ঘৰৰ এটা কোঠাত চিপ লৈ ওলমি থকা অৱস্থাত বুধবাৰে ৰাতিপুৱা উদ্ধাৰ কৰা হৈছিল বৰদলৈৰ মৃতদেহ, আৰক্ষীৰ দাবী।
বৰদলৈ কংগ্ৰেছৰ জ্যেষ্ঠ নেতা যদিও তেওঁ দলীয় কোনো বিষয়বাব নাছিল বুলি জানিব পৰা গৈছে।
১৯৯৯ চনত তেওঁ গায়িকা আৰু সংগীতজ্ঞ চিন্ময়ী বৰদলৈক বিয়া পাতিছিল।
তথ্য মতে বৰদলৈয়ে পণ্ডিচেৰি কেন্দ্ৰীয় বিশ্ববিদ্যালয়ৰ পৰা এম বি এ কৰিছিল।
গুৱাহাটী বাণিজ্য মহাবিদ্যালয়ৰ পৰা স্নাতক উত্তীৰ্ণ বৰদলৈয়ে স্কুলীয়া শিক্ষা লৈছিল খানাপাৰাৰ কেন্দ্ৰীয় বিদ্যালয়ত।
ৰতাৰি ক্লাবৰ সদস্য বৰদলৈ স্মাৰ্ত ইন্সতিতিউট অৱ লাৰ্নিঙৰ (তাতা ইন্সতিতিউট অৱ চ’চিয়েল চায়েন্সৰ হাব)ও সঞ্চালক আছিল।
