বিগত সপ্তাহৰ পৰা আৰম্ভ হোৱা গ্ৰেটাৰ গুৱাহাটী বেবী লীগৰ অনূৰ্ধ্ব ১১ আৰু অনূৰ্ধ্ব ১৩ শাখাৰ দ্বিতীয় দিনৰ খেলসমূহ ২৩ ডিচেম্বৰত অনুষ্ঠিত হৈ যায়। দেওবাৰৰ দিনটোত অনূৰ্ধ্ব ১১ আৰু ১৩ শাখাত সৰ্বমুঠ ১৭ খন খেল অনুষ্ঠিত হয়।
অনূৰ্ধ্ব ১১ শাখাত জি টি চি ৰাইনোজে সৰুসজাই শ্বাৰ্কছক ৪-০ৰ ব্যৱধানত, ৰিংচাং ঈগলছে এ পি আৰ অ’ পাইথ’নছক ৩-০, সংস্কৃতি ৱাৰিয়ৰে এছ বি জি জেক ১-০, ৰেইনব’ এফ চিয়ে দিছপুৰ লায়নছক ২-০, এন এফ আৰ চিটাজে জি ৱাই এছ এফ চি চি বুলছক ২-০ গ’লৰ ব্যৱধানত পৰাস্ত কৰে। আনহাতে সৰুসজাই হকছ আৰু পীগেছাছ এফ চিৰ খেলখন ১-১ ত ড্ৰ’ হয়।
আনহাতে অনূৰ্ধ্ব ১৩ শাখাত পীগেছাছ এফ চিয়ে এন এফ আৰ চিটাজক ১-০, সৰুসজাই হকছে ৰিংচাং ঈগলছক ২-১, এজি লিঅ’পাৰ্ডছে সংস্কৃতি ৱাৰিয়ৰ্ছক ৩-০, এ পি আৰ অ’ পাইথ’নছে সৰুসজাই শ্বাৰ্কছক ৪-০, থলুৱা পেন্থাৰ্ছে এছ বি জি জেক ৫-১, জি ৱাই এছ এফ চি চিয়ে এছগাৰ্ড এফ চিক ১-০, জি টি চি ৰাইন’জে ৰুৰেল ছ’কাৰ ক্লাৱক ৬-০ আৰু এ আৰ এফ চিয়ে জি টি চি পেন্থাৰ্ছক ৩-০ গ’লৰ ব্যৱধানত পৰাস্ত কৰে।
ইফালে গ’লশুন্যভাৱে ড্ৰ’ হয় লুটুমা ষ্টেগছ বনাম ৰেইনব’ এফ চি, ইণ্টাৰনেশ্যনেল ৰাইডাৰ্ছ বনাম দিছপুৰ লায়নছ আৰু জি ৱাই এছ এফ চি চি বনাম এন এফ আৰ ক্ৰ’জৰ মেচকেইখন।
উল্লেখ্য যে ৰাজ্যৰ প্ৰথমখন পূৰ্ণাংগ যুৱ ফুটবল লীগৰ আয়োজন কৰিছে স্প’ৰ্টছক্ৰাফ্ট মেনেজমেণ্টে। ভৱিষ্যতৰ তাৰকা গঢ় দিয়া আৰু ফুটবলৰ পৰিৱেশ ৰচনাৰ দীৰ্ঘম্যাদী লক্ষ্যৰে মিজোৰাম আৰু মেঘালয়ৰ পিছত উত্তৰ-পূবৰ তৃতীয়খন ৰাজ্য হিচাপে অসমতো আৰম্ভ হৈছে সৰ্বভাৰতীয় ফুটবল ফেডাৰেশ্যনৰ অভিলাষী প্ৰকল্প বেবী লীগৰ৷
এই লীগত সহযোগ কৰিছে গুৱাহাটী চিটী এফ চি (জি চি এফ চি) আৰু অসম ফুটবল সংস্থাই। এই লীগত চাৰিটা বয়সভিত্তিক গোটৰ (৬-৭/৮-৯/১০-১১/১২-১৩) খিতাপৰ বাবে মুঠ ৫৭টা দলে প্ৰতিদ্বন্দ্বিতা কৰিছে আৰু অংশগ্ৰহণ কৰিছে ৩৪০ গৰাকী শিশু খেলুৱৈয়ে।
ইয়াৰ উপৰি সৰ্বভাৰতীয় ফুটবল ফেডাৰেশ্যনৰ নীতি-নিয়ম অনুসৰি চলা এই লীগত সহযোগ কৰিছে ডেকাথল্ন, ইগুৱা পেকেজ্ড ৱাটাৰ, ছানভেলী হাস্পতাল আৰু চেম্পিয়ন্স ফুড ক’ৰ্টে।
