আজি এক ঐতিহাসিক ক্ষণৰ সাক্ষী হৈ ৰ’ল সমগ্ৰ দেশবাসী। প্ৰায় কুৰি বছৰৰ অপেক্ষাৰ অন্তত আজি মুকলি কৰা হ’ল বগীবিল দলং। প্রধানমন্ত্ৰী নৰেন্দ্ৰ মোডীয়ে ৰঙা ফিটা কাটি উদ্বোধন কৰিলে দেশৰ আটাইতকৈ দীৰ্ঘতম ৰে’ল আৰু স্থলপথ সংযোগী এই দলংখন। এই দলংখন মুকলি হোৱাৰ লগে লগে ব্ৰহ্মপুত্ৰৰ উত্তৰ আৰু দক্ষিণপাৰৰ সংযোগ ঘটিল।
প্ৰধান মন্ত্ৰী নৰেন্দ্ৰ মোদীয়ে আজি দিনৰ ২.২৫ বজাত ব্ৰহ্মপুত্ৰৰ ওপৰত নিৰ্মিত দেশৰ আটাইতকৈ দীৰ্ঘতম ৰে’ল আৰু স্থলপথ সংযোগী দলংখন আনুষ্ঠানিকভাৱে ফিটা কাটি উদ্বোধন কৰে। আজিৰ এই উদ্বোধনী অনুষ্ঠানত অসমৰ ৰাজ্যপাল অধ্যাপক জগদীশ মুখী আৰু মুখ্য মন্ত্ৰী সৰ্বানন্দ সোণোৱাল উপস্থিত থাকে। বগীবিল দলঙ মুকলি হোৱাৰ লগে লগে অঞ্চলটোৰ জনসাধাৰণৰ এক দীৰ্ঘদিনীয়া সপোন পূৰণ হ’ল।
ব্ৰহ্মপুত্ৰৰ দক্ষিণ পাৰত অনুষ্ঠিত উদ্বোধনী অনুষ্ঠানত দেশৰ নামত বগীবিল দলংখন উৎসৰ্গা কৰি প্ৰধান মন্ত্ৰী গৰাকীয়ে দলংখনৰ ওপৰেৰে ব্যাপক সুৰক্ষাৰ মাজেৰে নদীখনৰ উত্তৰ পাৰৰ কাৰেং চাপৰিত গৈ উপস্থিত হয়।
দলংখনৰ সৌন্দৰ্য আৰু ঠাইখনৰ নৈসৰ্গিক শোভাত মুগ্ধ হৈ প্ৰধান মন্ত্ৰী গৰাকীয়ে উপস্থিত ৰাইজলৈ হাত জোকাৰি নতুন দলংখনৰ ওপৰেৰে কিছু দূৰত্ব খোজকাঢ়ি আগবাঢ়ে আৰু তাৰপাছতো কিছুদূৰ এখন খোলা জীপত উঠি আগবাঢ়ে। এই সময়ত তেওঁৰ সুৰক্ষাৰ দায়িত্বত থকা কনভয়টোৱেও তেওঁক অনুসৰণ কৰে।
ইয়াৰ আগেয়ে প্ৰধান মন্ত্ৰীগৰাকীক মোহনবাৰী বিমানবন্দৰত উপস্থিত হোৱাৰ পাছত অসমৰ ৰাজ্যপাল অধ্যাপক জগদীশ মুখী আৰু মুখ্য মন্ত্ৰী সৰ্বানন্দ সোণোৱালে উষ্ম আদৰণি জনায়। বিমানবন্দৰত অসম চৰকাৰৰ মুখ্য সচিব আলোক কুমাৰ আৰু আৰক্ষী সঞ্চালক প্ৰধান কুলধৰ শইকীয়াও উপস্থিত থাকে। ইয়াৰ পৰাই প্ৰধান মন্ত্ৰী গৰাকীয়ে বগীবিল দলঙৰ আনুষ্ঠানিক উদ্বোধনী অনুষ্ঠানৰ স্থানলৈ ৰাওনা হয়।
উল্লেখযোগ্য যে আজি উদ্বোধন কৰা বগীবিল দলংখনৰ দৈৰ্ঘ্য হৈছে ৪.৯৪ কিলোমিটাৰ আৰু ইয়াৰ প্ৰস্থ হৈছে ১২৫ মিটাৰ।এই দলংখনত মুঠতে ২ টা খুটা আছে। নদীখনৰ জলস্তৰৰ পৰা দলংখনৰ উচ্চতা হৈছে ৩২ মিটাৰ।
আনহাতে, দলংখনৰ ৰিখটাৰ স্কেলত ৭ প্ৰাবল্যৰ ভূমিকম্প প্ৰতিৰোধ কৰিব পৰা ক্ষমতা আছে। ব্ৰহ্মপুত্ৰৰ ওপৰত নিৰ্মাণ কৰা দলঙৰ বগীবিল হৈছে ষষ্ঠখন দলং। ১৯৯৭ চনত এইচ ডি দেবগৌডা প্ৰধান মন্ত্ৰী হৈ থকা সময়তে দলংখনৰ আধাৰশিলা স্থাপন কৰা হৈছিল। আনহাতে, ২০০২ চনৰ ২১ এপ্ৰিলত তদানীত্বন প্ৰধান মন্ত্ৰী অটল বিহাৰী বাজপেয়ীয়ে বগীবিল দলঙৰ নিৰ্মাণৰ শুভাৰম্ভ কৰিছিল।
