যোৱা বছৰ মে’ মাহত প্ৰধান মন্ত্ৰী মোদীয়ে দেশৰ দীৰ্ঘতম ঢলা-শদিয়া দলংখন উদ্বোধন কৰিয়েই ইয়াক ড০ ভূপেন হাজৰিকাৰ নামত নামকৰণ কৰিছিল। মোদীৰ সৌভাগ্য যে এবছৰ মানৰ ব্যৱধানতে, এই বছৰৰ ২৫ ডিচেম্বৰত ৰাজ্যখনৰ আন এখন গুৰুত্বপূৰ্ণ বগীবিল দলঙো উদ্বোধন কৰাৰ সৌভাগ্য ঘটিল।
কিন্তু তাৎপৰ্য্যপূৰ্ণভাৱে এইবাৰ দলংখন নামকৰণৰ পৰা বিৰত থাকিল প্ৰধান মন্ত্ৰী মোদী বা চৰকাৰ। অথচ পূৰ্বৰ অভিজ্ঞতাৰ পৰা অসমৰ মানুহে আশা কৰি আছিল যে ২৫ ডিচেম্বৰত দলংখন উদ্বোধন কৰাৰ লগতে নামকৰণো কৰা হ’ব। সেই আশাতে বিভিন্ন দল-সংগঠনে দলংখনৰ নাম তেওঁলোকৰ ঐতিহাসিক ব্যক্তিত্বৰ নামত নামকৰণৰ দাবী তুলি আহিছিল।
আনকি মাজতে এই খবৰ ওলাইছিল যে বগীবিল দলঙৰ নাম চুতীয়াসকলৰ বীৰাংগনা সতী সাধনীৰ নামেৰে সতী সাধনী সেতু কৰাৰ আহ্বান জনাই ৰাজ্যৰ পৰিবহণ বিভাগে ৰে’ল বিভাগলৈ পত্ৰ প্ৰেৰণ কৰিছে। পৰিবহণ বিভাগৰ উপ সচিব ৰাহুল চন্দ্ৰ দাসে উত্তৰ-পূব ৰে’লৱেৰ মহাপ্ৰৱন্ধকলৈ এই পত্ৰ প্ৰেৰণ কৰা বুলি সংবাদ মাধ্যমত প্ৰকাশ পাইছিল।
কিন্তু তাৰ পিছতে বিভিন্ন পক্ষৰ বাদ-প্ৰতিবাদ, দাবীৰ মাজেৰে দলংখনৰ নামটোক লৈ এক অবাঞ্ছিত বিতৰ্কৰ সূত্ৰপাত ঘটে। আহোম, মিচিং, দেউৰীসকলেও তেওঁলোকৰ ইতিহাসৰ শ্ৰদ্ধেয় নেতা-নেত্ৰীৰ নামেৰে দলংখন নামকৰণ দাবী তুলিলে। লগতে এটা ৰাজনৈতিক শক্তিয়ে দলংখনৰ নাম অটল সেতু কৰিব লাগে বুলিও দাবী উত্থাপন কৰিলে।
কিন্তু তাৰ পিছতো প্ৰধান মন্ত্ৰী অথবা চৰকাৰ দলংখনৰ নামকৰণৰ পৰা বিৰত থাকিল। ইয়াৰ অন্তৰালত ভোটৰ অংক নে ৰাজনীতি নে আন কিবা, সেই কথাটোৱে ভিন্নজনৰ মনত প্ৰশ্ন হৈ খুন্দিয়াই আছে। কাৰণ নাম এটাৰ প্ৰস্তাৱ ইতিমধ্যে ৰে’ল বিভাগলৈ প্ৰেৰণ কৰা হৈছে বুলি চৰকাৰৰ সূত্ৰৰ পৰাই জানিব পৰা গৈছিল।
মন কৰিব লগীয়া যে দলংখনৰ নাম অসম চৰকাৰে বীৰাংগনা সতী সাধনী সেতু হিচাপে নামকৰণ কৰিবলৈ কেন্দ্ৰীয় চৰকাৰলৈ প্ৰেৰণ কৰা প্ৰস্তাৱ অনুসৰি ভাৰতৰ প্ৰধান মন্ত্ৰীয়ে ২৫ ডিচেম্বৰত উদ্বোধনৰ সময়ত নাম ঘোষণা নকৰিলে চৰকাৰৰ চৰম প্ৰতাৰণাৰ প্ৰতিবাদত সংগঠনটোৰ ২২জন নেতাই আত্মজাহ কৰিব বুলি ভাবিকু দিছিল।
কিন্তু তাৰ পিছতো দলংখনৰ নামকৰণৰ পৰা বিৰত থাকিল প্ৰধান মন্ত্ৰী মোদী। সকলোকে ভবাই তোলা কথাটো হ’ল- নিৰ্বাচনৰ আগ মুহূৰ্তত কোনো জনাংশ, তথা দল-সংগঠনক বিতুষ্ট কৰাৰ পৰা বিৰত থকাৰ কৌশল নেকি এয়া? নে নিৰ্বাচন যোৱাৰ পিছত লাহেকৈ অটল হেতু বা ৰাজীৱ হেতু কৰাৰ বাট খোলা ৰখাৰ কৌশল?
নে এইখন দলঙো শৰাইঘাট দলঙৰ দৰে ইয়াৰ মূল নামেৰেই থাকি যাব? বহুতেই অৱশ্যে বগীবিল দলঙৰ নাম বগীবিল দলং থকাৰ সপক্ষেই মত দাঙি ধৰিছে।
