আজি শিৱসাগৰ জিলা উপায়ুক্তৰ কাৰ্য্যালয়ৰ সন্মুখত অসম জাতীয়তাবাদী যুৱ ছাত্ৰ পৰিষদ শিৱসাগৰ জিলা সমিতিয়ে অসমত আন্তঃৰাষ্ট্ৰীয় পাৰপত্ৰ প্ৰৱৰ্তন আৰু দ্বি-নাগৰিকত্ব ব্যৱস্থা প্ৰৱৰ্তনৰ দাবীত ১০ ঘন্টীয়া অনশন কাৰ্য্যসূচী ৰূপায়ণ কৰে।
সংবাদ মাধ্যমলৈ দিয়া এক প্ৰেছ বিবৃতিত সংগঠনটোৰ সভাপতি দিব্যজ্যোতি দাস আৰু দাদুল নেওগে কয় যে বহু বছৰ ধৰি বহিঃৰাষ্ট্ৰ আৰু বহিঃৰাজ্যৰ পৰা অসমত যি ধৰণে অনুপ্ৰৱেশ কাৰীয়ে অনুপ্ৰৱেশ কৰিছেহি তাৰ ফলত অসমৰ জাতি মাটি ভেটিৰ লগতে ই অসমীয়া সংস্কৃতিৰ প্ৰতি এক ভয়ানক অশনি সংকেত কঢ়িয়াই আনিছে।
তাৰোপৰি কয় যে এই ক্ষেত্ৰত অসমৰ কোনো এখন চৰকাৰে অসমীয়া জাতিৰ প্ৰতি অহা ভয়াৱহতাৰ সম্পৰ্কত সম্পূৰ্ণ এক উদাসীন মনোভাৱহে পোষণ কৰি আহা দেখা গৈছে। শেহতীয়াকৈ জাতি, মাটি ভেটি ৰক্ষাৰ নামত শাসনৰ গাদীত বহা বিজেপি নেতৃত্বধীন কেন্দ্ৰীয় আৰু ৰাজ্য চৰকাৰে শাসনৰ গাদীত বহিয়েই সম্পূৰ্ণ ওলোটা খৰ মাৰি জাতি মাটি আৰু ভেটি ৰখাটো দূৰৰে কথা বৰঞ্চ চুবুৰীয়া ৰাষ্ট্ৰৰ বিদেশীক অসমত সংস্থাপিত কৰি অসমীয়া জাতিক নি:শেষ কৰি দিয়াৰ এক ষাড়যন্ত্ৰত লিপ্ত হোৱাহে দেখা গৈছে।
চুবুৰীয়া ৰাজ্য অৰুণাচল, নাগালেণ্ড আৰু মিজোৰামৰ দৰেে অসমতো পূৰ্ণ স্বায়ত্ত শাসন আৰু দ্বি-নাগৰিকত্ব ব্যৱস্থাৰ জৰিয়তে অসমৰ ভূমি সম্পদ আৰু সংস্কৃতিৰ ওপৰত অসমীয়াৰ অধিকাৰ সাব্যস্ত কৰিবৰ বাবে এই ১০ ঘন্টীয়া অনশনৰ কাৰ্য্যসূচী ৰূপায়ণেৰে চৰকাৰৰ ওচৰত দাবী উত্থাপন কৰে। খিলঞ্জীয়াৰ ভোটেৰে চৰকাৰ গঠন কৰা বিজেপি চৰকাৰখনে অসমীয়াৰ স্বাৰ্থত সংগঠনটোৰ এই দাবীক যথাযোগ্য গুৰুত্ব প্ৰদান কৰিবলৈ আহ্বান জনাইছে।
