ইংৰাজী নৱবৰ্ষ সমাগত। নতুন বছৰটোৰ আৰম্ভণিৰ প্ৰাক্ক্ষণত সাধাৰণতে সকলোৰে মনত ৰং-ৰইচ দেখিবলৈ পোৱা যায়। কিন্তু এইবেলি মনত ৰং নাই গুৱাহাটী গ্ৰন্থমেলাৰ বিপনী সমুহত বহি থকা গ্ৰন্থ বিক্ৰেতা সকলৰ মনত।
অসম প্ৰকাশন পৰিষদৰ উদ্যোগত অনুষ্ঠিত এই গ্ৰন্থমেলাত এইবাৰ এখনো কিতাপ বিক্ৰী নোহোৱাকৈয়ে দিনটো পাৰ কৰিবলগীয়া হৈছে বহু বিপনীৰ বিক্ৰেতাই। যিসকলৰ দুই এখন কিতাপ বিক্ৰী হৈছে সেয়াও লাভজনক বুলিব নোৱাৰি। আশানুৰূপ বিক্ৰী নোহোৱাৰ বাবে কেইবাখনো বিপনীৰ ভাড়াৰ বাবদ আদায় দিবলগীয়া টকাখিনিও উভতি নাহিব বুলি বিক্ৰেতাই প্ৰকাশ কৰিছে।
যোৱা ২২ ডিচেম্বৰৰ পৰাই গুৱাহাটীৰ চানমাৰিস্থিত অসম অভিযান্ত্ৰিক প্ৰতিষ্ঠান খেলপথাৰত ৩২ সংখ্যক গুৱাহাটী গ্ৰন্থমেলা চলি আছে। বিগত বছৰবোৰৰ দৰে এইবাৰো গ্ৰন্থমেলাখনত দেশ বিদেশৰ প্ৰকাশন গোষ্ঠী আৰু গ্ৰন্থ বিক্ৰেতাই ভাগ লৈছে।
গুৱাহাটী গ্ৰন্থমেলাৰ উদ্যোক্তাই প্ৰকাশ কৰা তথ্য অনুসৰি এইবাৰৰ গ্ৰন্থমেলাত ১২২ খন গ্ৰন্থ বিপনী আছে। ইয়াৰে ৯২ খন অসমৰ, দিল্লীৰ ৯ খন, কলকাতাৰ ১০ খন, ঝাৰখণ্ডৰ ১ খন আৰু বাংলাদেশৰ ১০খন বিপনীয়ে অংশগ্ৰহণ কৰিছে।
কিন্তু বিপনী অনুপাতে গ্ৰাহকৰ উপস্থিতি তেনেই সেৰেঙা পৰিলক্ষিত হৈছে। যাৰ বাবে গ্ৰন্থমেলাৰ বাকৰিত হতাশ হ’বলগীয়া হৈছে বেছিভাগ বিক্ৰেতাই। দেওবাৰে আমাৰ সাংবাদিকে কেইবাখনো বিপনীৰ বিক্ৰেতাৰ সৈতে কথা পতাত এই দুখ লগা ছবিখন পোহৰলৈ আহে।
দিক্ষা এজেঞ্চি নামৰ প্ৰতিষ্ঠানটোৰ বিক্ৰেতা শৰ্মাৰাম বড়োই আমাক কয়, ‘’২২ তাৰিখৰ পৰা এতিয়ালৈ যোৱা আঠ দিনত মই মাত্ৰ ১৫০০ মান টকাৰহে কিতাপ বিক্ৰী কৰিছো। আজি এতিয়ালৈ এখনো কিতাপ বিক্ৰী হোৱা নাই।‘’ তেওঁ লগতে আগৰ গ্ৰন্থমেলা সমুহত ইমান বেয়া ব্যৱসায় হোৱা নাছিল বুলিও মন্তব্য কৰে।
দিল্লীৰ পৰা অহা হেপ্পী বুক চাৰ্ভিচ নামৰ প্ৰকাশন গোষ্ঠীটোৱেও আমাৰ সাংবাদিকৰ আগত আক্ষেপ প্ৰকাশ কৰি কয়, ‘’আমি প্ৰতিবছৰেই গুৱাহাটী গ্ৰন্থমেলালৈ আহো। কিন্তু ইমান বেয়া অৱস্থা আগতে কেতিয়াও হোৱা নাছিল। আমাৰ অহা-যোৱাত প্ৰায় এক লাখ টকা খৰচ হ’ব, ইয়াৰ উপৰি বিপনীৰ ভাড়া আছেই। আমি সাংঘাতিক ধৰণে লোকচানৰ সন্মুখীন হৈছো।‘’
প্ৰকাশন গোষ্ঠীটোৰ হৈ বিক্ৰেতা বিৰেন্দৰ কুমাৰ জৈনে এতিয়ালৈ মাত্ৰ দহ হাজাৰ মান টকাৰ গ্ৰন্থ বিক্ৰী হোৱা বুলি আমাৰ আগত প্ৰকাশ কৰে।
‘’প্ৰকাশন পৰিষদে অনুষ্ঠিত কৰা এই গ্ৰন্থমেলাখনক লৈ বহু আশা কৰো, যথেষ্ট ভাল হয় আৰু গাম্ভীৰ্য থাকে। কিন্তু এইবাৰ অভূতপূৰ্বভাৱে গ্ৰাহকৰ সঁহাৰি নাই, আমাৰ ব্যৱসায় একেবাৰেই বেয়া’’, -এই মন্তব্য সাতভনী প্ৰকাশনৰ বিক্ৰেতা সুশান্ত মাধৱ বৰুৱাৰ।
একেদৰে ‘’এইবাৰৰ বিক্ৰীৰ অৱস্থা ক’বলৈ লাজলগা। ব্যৱসায় ইমান বেয়া হ’ব বুলি জনা হ’লে নাহিলোৱেহেঁতেন’’ বুলি কয় কল্পতৰু প্ৰকাশনৰ বিক্ৰেতা গোবিন্দ বৈশ্যই।
ইপিনে, গ্ৰন্থমেলাৰ আৰম্ভণিৰ দিনাৰ পৰাই বিপনী খুলি বহি থাকি আজি ৯ দিন হোৱালৈ দুখন মাত্ৰ পাঁচশটকীয়া কিতাপ বিক্ৰী কৰিবলৈ সক্ষম হোৱা পেলিকান বুক ডিষ্ট্ৰিবিউটৰৰ বিক্ৰেতা কুশল শৰ্মাই ‘’চৰকাৰী সাহায্য নহ’লে আমি ক্ষুদ্ৰ গ্ৰন্থ বিক্ৰেতা বা প্ৰকাশক জীয়াই থকাটোৱে সমস্যা হ’ব’’ বুলি দুখেৰে কয়।
কেইবাজনো বিক্ৰেতাৰ মতে মাত্ৰ এমাহৰ আগত উত্তৰ-পূব গ্ৰন্থমেলা অনুষ্ঠিত হৈ যোৱা বাবে এইখন গ্ৰন্থমেলাত গ্ৰাহকৰ ভিৰ কম হৈছে আৰু ব্যৱসায়ীয়েও মন্দাৱস্থাৰ সন্মুখীন হ’বলগীয়া হৈছে। আনহাতে, প্ৰয়োজনত কৈ বিপনীৰ সংখ্য বহু বেছি হোৱা বাবেও ব্যৱসায় অত্যন্ত দুখলগা হোৱা বুলিও কেইবাগৰাকীও বিক্ৰেতাই মন্তব্য কৰে।
উল্লেখ্য যে, গ্ৰন্থমেলাখনৰ একোখন বিপনীৰ বাবদ ভাড়া দিব লাগে দহ হাজাৰ টকা। বহু বিক্ৰেতাই ভাড়াৰ বাবদ খৰচ হোৱা ধন ঘুৰাই নোপোৱাটোও খাটাং।
