মুম্বাই মাৰাথনৰ ষষ্ঠদশ সংস্কৰণৰ বাবে ‘ইভেণ্ট এম্বেছাডৰ’ হিচাপে নিযুক্ত কৰা হৈছে ছবাৰৰ বিশ্ব মহিলা বক্সিং চেম্পিয়ন তথা ‘মেগনিফিচেণ্ট মেৰী’ হিচাপে পৰিচিত এম চি মেৰী কমক।
অহা ২০ জানুৱাৰিত অনুষ্ঠিত হ’ব লগীয়া মুম্বাই মাৰাথনৰ ‘ইভেণ্ট এম্বেছাডৰ’ হিচাপে নিযুক্ত হোৱাৰ পাছতে ৩৫ বছৰীয়া বক্সাৰগৰাকীয়ে কয় যে বিভিন্ন দেশৰ আগশাৰীৰ দৌৰবিদ সকলক আকৰ্ষিত কৰিব পৰাটোৱে এই টুৰ্নামেণ্টখনৰ সফলতাৰ প্ৰমাণ। এনে এখন আগশাৰীৰ টুৰ্নামেণ্টৰ সৈতে জড়িত হ’ব পৰাটো মোৰ বাবে আনন্দৰ বিষয়।
দিল্লীত অনুষ্ঠিত হৈ যোৱা বিশ্ব মহিলা বক্সিং চেম্পিয়নশ্বিপত ৩৫ বছৰীয়া মণিপুৰী মাতৃগৰাকীয়ে ষষ্ঠ বাৰৰ বাবে বিশ্ব খিতাপ দখল কৰি বক্সিঙৰ বিশ্ব চেম্পিয়নশ্বিপত বিৰল ইতিহাস সৃষ্টি কৰে। তেওঁৰ বাদে ইমান সংখ্যক বাৰ বক্সিঙৰ বিশ্ব খিতাপ কোনো মহিলাই দখল কৰিব পৰা নাই।
উল্লেখ্য যে, বিশ্বৰ শীৰ্ষৰ দহখন মাৰাথন প্ৰতিযোগিতাৰ ভিতৰত অন্যতম হিচাপে পৰিচিত মুম্বাই মাৰাথনৰ মুঠ প্ৰাইজমানী হৈছে ৪০৫,০০০। প্ৰতিযোগিতাখনত বিশ্বৰ বিভিন্ন দেশৰ পৰা অহা প্ৰায় ৪৬ হাজাৰ দৌৰবিদে অংশ ল’ব বুলি জানিব পৰা গৈছে।
