ন্যায্যপ্ৰাপ্তিৰ দাবীত বিদ্যালয়ৰ পাঠদান এৰি পুনৰ আন্দোলনৰ বাবে সাজু হৈছে প্ৰাথমিক শিক্ষক। ৰাজ্য চৰকাৰৰ প্ৰতাৰণাৰ বিৰুদ্ধে আকৌ এবাৰ সৰৱ হৈ উঠিছে প্ৰাথমিক শিক্ষকসকল। অসম ৰাজ্যিক প্ৰাথমিক শিক্ষক সন্মিলনীয়ে তেওঁলোকৰ বিভিন্ন সমস্যা সমাধানৰ দাবীত এলানি আন্দোলনৰ কাৰ্যসূচী ঘোষণা কৰিছে।
সন্মিলনীয়ে প্ৰাথমিক বিদ্যালয়ত প্ৰধান শিক্ষকৰ পদ সৃষ্টি কৰি সপ্তম দৰমহা আয়োগে নিৰ্ধাৰণ কৰা গ্ৰেড পে আদায় দিয়া, প্ৰাথমিক বিদ্যালয়ত কৰ্মৰত সকলো প্ৰশিক্ষণপ্ৰাপ্ত স্নাতক শিক্ষকৰ পদ হ্ৰাস কৰি কাঢ়ি নিয়া, ৮৭০০ টকাৰ গ্ৰেড পে ঘূৰাই দিয়া, সাময়িক পদোন্নতিৰ মান্যতা বাহাল ৰখা আদি দাবীসমূহ পুনৰ উত্থাপন কৰিছে।
তদুপৰি, কৰ্মৰত সকলো ঠিকাভিত্তিক শিক্ষকক নিয়মীয়া কৰা, চাকৰিৰ নিৰাপত্তা সুনিশ্চিত কৰা, পাবলৈ বাকী থকা বকেয়া ধন আদায় দিয়া, নতুন পেঞ্চন নীতি বাতিল কৰি পুৰণি পেঞ্চন নীতি বাহাল ৰখা, অপ্ৰাদেশীকৃত বিদ্যালয়সমূহ শীঘ্ৰে প্ৰাদেশিকীকৰণ কৰা আদিকে ধৰি মুঠ ১২ দফীয়া দাবীৰে সন্মিলনীয়ে পুনৰ আন্দোলনৰ ঘোষণা কৰিছে।
অসম ৰাজ্যিক প্ৰাথমিক শিক্ষক সন্মিলনীয়ে তেওঁলোকৰ উক্ত দাবীসমূহৰ সমৰ্থনত অহা ১১ জানুৱাৰিত গুৱাহাটীৰ লখৰা চাৰিআলি থকা উদয় কৃষ্টি সংঘৰ খেলপথাৰত এক বিশাল প্ৰতিবাদী সমাৱেশ অনুষ্ঠিত কৰিব। উক্ত দিনা ৰাজ্যখনৰ সকলোবোৰ প্ৰাথমিক বিদ্যালয় বন্ধ ৰাখি কৰ্মৰত শিক্ষকসকলে প্ৰতিবাদী কাৰ্যসূচীত যোগদান কৰিব।
বৃহস্পতিবাৰে এক প্ৰেছ বাৰ্তাযোগে কাজলগাঁও মহকুমা প্ৰাথমিক শিক্ষক সন্মিলনীৰ সাধাৰণ সম্পাদক আবু জাফৰ মণ্ডলে এই সন্দৰ্ভত সৱিশেষ জানিবলৈ দি সকলো কৰ্মৰত শিক্ষককে নিজ নিজ বিদ্যালয়ৰ পাঠদান কাৰ্য বন্ধ ৰাখি ১১ জানুলাৰিৰ শিক্ষক সমাৱেশত যোগদান কৰিবলৈ আহ্বান জনাইছে।
আনহাতে, উক্ত শিক্ষক সমাৱেশৰ পাছতো চৰকাৰে সমস্যাসমূহ সমাধানৰ ক্ষেত্ৰত তৎপৰতাৰে কাৰ্যকৰী ব্যৱস্থা গ্ৰহণ নকৰিলে অহা ৪, ৫ আৰু ৬ ফেব্ৰুৱাৰিত সৰ্বাত্মক অসহযোগ কাৰ্যসূচী ৰূপায়ণ কৰাৰ কথাও মণ্ডলে জানিবলৈ দিয়ে।
