৪ জানুৱাৰি শুকুৰবাৰে অসম আৰক্ষীৰ ভিজিলেঞ্চ আৰু দুৰ্নীতি-বিৰোধী বিভাগৰ অভিযানত দৰঙৰ জিলা ঔষধ পৰিদৰ্শক কাৰ্যালয়ৰ কৰ্মচাৰী এজন গ্ৰেপ্তাৰ হৈছে। অভিযুক্তজনক মঙলদৈ টাউনৰ ২ নং ৱাৰ্ডৰ বাসিন্দা নাছিউৰ ৰহমান বুলি চিনাক্ত কৰা হৈছে।
অভিযুক্তই বেছিমাৰীৰ বাসিন্দা আজগৰ আলীক এখন হোলছেল ঔষধৰ অনুজ্ঞাপত্ৰ দিয়াৰ বাবে ৩০,০০০ টকা উৎকোচ বিচাৰিছিল। তাৰ পাছতেই আজগৰ আলীয়ে অসম আৰক্ষীৰ ভিজিলেঞ্চ আৰু দুৰ্নীতি-বিৰোধী বিভাগৰ সহায় বিচাৰে। তাৰ পাছত বিভাগে অভিযুক্তজনক ধৰাৰ বাবে জাল পেলায়। আজগৰ আলীয়ে ৰহমানক তেওঁৰ ভাৰাত লোৱা কাৰ্যালত ২৫,০০০ টকা উৎকোচ হিচাপে আগবঢ়ায়।
প্ৰথমতে ৰহমানে টকাখিনি লৈছিল যদিও সন্দেহ হোৱাত টকাখিনি পেলাই দি তেওঁ পলাব বিচাৰে। কিন্তু অসামৰিক পোচাকত জোপ লৈ থকা আৰক্ষীৰ লোকে লগে লগে তেওঁক ধৰি পেলায়। প্ৰাথমিক জেৰাত অভিযুক্ত ৰহমানে উৎকোচৰ ধনখনি লোৱাৰ কথা অস্বীকাৰ কৰিছিল।
এই অভিযানক নেতৃত্ব দিয়া আৰক্ষীৰ উপ অধীক্ষক অমিত কুমাৰ হোজায়ে নৰ্থ ইষ্ট নাওক জনাইছে যে নাছিউৰ ৰহমানৰ বিৰুদ্ধে চলা এই অভিযানটো নিশা ৯-০০ বজালৈকে চলিছিল আৰু ভিজিলেঞ্চ আৰু দুৰ্নীতি-বিৰোধী বিভাগে অভিযুক্তৰ বাসগৃহত তালাচী চলাইছিল। তাৰ পূৰ্বে বিভাগে ৰহমানৰ বিপক্ষে দুৰ্নীতি বিবাৰক আইনৰ অন্তৰ্গত (০১/১৯) এটা গোচৰ ৰুজু কৰিছিল। অভিযুক্ত ৰহমানক পাছত মঙলদৈৰ পৰা গুৱাহাটীলৈ অনা হয়।
