নাগৰিকত্ব আইন (সংশোধনী) বিধেয়কৰ বিৰুদ্ধে আছু আৰু ৩০ জনগোষ্ঠীয় সংগঠনে ধাৰাবাহিক ভাৱে আন্দোলন চলাই আছে। অসম চৰকাৰে আৰু কেন্দ্ৰীয় চৰকাৰে অসমৰ খিলঞ্জীয়া ৰাইজক বাৰম্বাৰ প্ৰতাৰণা কৰাৰ লগতে চৰকাৰখনৰ নীতিক মাজুলী মহকুমা ছাত্ৰ সন্থাই তীব্ৰ ভাষাৰে গৰিহণা দিছে৷
এক প্ৰেছ বিবৃতিত সভাপতি অজিত হাজৰিকা আৰু সম্পাদক বিতোপন শৰ্মাই কয় যে মোডীৰ নেতৃত্বত কেন্দ্ৰীয় চৰকাৰ আৰু সোণোৱাল নেতৃত্বাধীন অসম চৰকাৰে চূড়ান্তভাৱে অসমীয়া জাতিটোক প্ৰতাৰণা কৰি অন্ধকাৰলৈ থেলি দিছে৷ অসমৰ ভাষা – সাহিত্য, সংস্কৃতি, ঐতিহ্যক চূড়ান্তভাৱে অপমান কৰিছে৷
মাজুলী আছুৰ উপদেষ্টা পবিত্ৰ গোস্বামীয়ে কয়, ‘‘খিলঞ্জীয়াৰ অস্তিত্ব বিনাশ কৰিব খোজা সিদ্ধান্ত কোনো কাৰণত আছুৱে মানি নলয় আৰু অবৈধ বিদেশীৰ বোজা অসমে নলয়৷ অসমীয়াৰ আবেগ অনুভূতিক চৰকাৰে অপমান কৰি ভোটবেংক সুৰক্ষিত কৰাৰ স্বাৰ্থত ব্যস্তহৈ পৰিছে৷’’
আছুৰ কেন্দ্ৰীয় কাৰ্য নিৰ্বাহক সূৰ্য কুমাৰ ভূঞাই কয় যে অসমীয়া জাতিৰ প্ৰতি বিশ্বাসঘাতকতা কৰা সকলক শিক্ষা দিয়াৰ এয়াই উচিত সময়৷ জাতি মাটি ভেটিৰ কথা কৈ শাসনৰ গাদীত বহা চৰকাৰখনে এতিয়া খিলঞ্জীয়াৰ মতক ভেঙুচালি কৰি বুঢ়া আঙুলি দেখুৱাইছে আৰু অসমৰ জাতীয় চহিদসকলক অপমান কৰিছে৷ মহকুমা আছুৰ সম্পাদক বিতোপন শৰ্মাই কয় যে প্ৰধানমন্ত্ৰী গৰাকীয়ে দাম্ভিকভাৱে ভোটবেংক শক্তিশালী কৰিবৰ বাবেই অসমীয়াৰ আৱেগক ভৰিৰে মোহাৰিছে৷
সেয়ে অহা ৮ জানুৱাৰী, ২০১৯ ত পুৱা ৫-০০ বজাৰ পৰা বিয়লি ৪-০০ বজালৈ আছু আৰু ৩০ জনগোষ্ঠীয় সংগঠনে আহ্বান জনোৱা অসম বন্ধক সফল কৰি শান্তি-শৃংখলা বজাই ৰাখি জাতিটোৰ স্বাৰ্থত সহযোগ কৰিবলৈ মাজুলী মহকুমা ছাত্ৰ সন্থাই সৰ্বস্তৰৰ ৰাইজক আহ্বান জনাইছে৷