নগৰিকত্ব সংশোধনী বিধেয়ক ২০১৬’ বাতিলৰ দাবীত আছুৱে আহ্বান জনোৱা অসম বন্ধৰ প্ৰতি ৰাজ্যৰ জনসাধাৰণে স্বত:স্ফুৰ্ত সঁহাৰি জনাইছে। পুৱাৰে পৰা ৰাজ্যৰ বিভিন্ন প্ৰান্তত যান-বাহন, শিক্ষানুষ্ঠান, চৰকাৰী-বেচৰকাৰী কাৰ্যালয় তথা ব্যৱসায়িক প্ৰতিষ্ঠান আদি বন্ধ হৈ পৰে।
নাগৰিকত্ব সংশোধনী বিধেয়কৰ বিৰুদ্ধে সদৌ অসম ছাত্ৰ সন্থাৰ আহ্বানত তথা ৩০ টা জনগোষ্ঠীয় ছাত্ৰ সংগঠনৰ সমৰ্থনত অসম বন্ধৰ ব্যাপক প্ৰভাৱ পৰিছে গুৱাহাটী মহানগৰীতো। মহানগৰীৰ বাট-পথত যান বাহনৰ চলাচল, দোকান-পাহাৰ আদি বন্ধ থকাৰ লগতে জনসাধাৰণেও নৈমিত্তিক কাম-কাজলৈ ওলাই অহা দেখা যোৱা নাই।
নলবাৰীৰ পাইকাৰকুছিৰ ৩১নং ৰাষ্ট্ৰীয় ঘাইপথত টায়াৰ জ্বলাই বন্ধ সমৰ্থকে প্ৰতিবাদ কৰে। ইতিমধ্যে আৰম্ভ হোৱা অসম বন্ধৰ কাৰ্যসূচীৰ সমগ্ৰ নলবাৰীতে সৰ্বাত্মক প্ৰভাৱ পৰিছে।
নুমলীগড়ত কৃষক মুক্তি সংগ্ৰাম সমিতি, ছাত্ৰ মুক্তি সংগ্ৰাম সমিতি আৰু টাই আহোম ছাত্ৰ সন্থাৰ কৰ্মীয়ে ৰাজপথত টায়াৰ জ্বলাই প্ৰতিবাদ সাৱ্যস্ত কৰে। ইপিনে, নুমলীগড়ৰ দৈগ্ৰোঙত ৰাজপথত টায়াৰ জ্বলাই উত্তাল প্ৰতিবাদ সাৱ্যস্ত কৰাৰ সময়তে আৰক্ষী আৰু প্ৰতিবাদকাৰীৰ মাজত সংঘটিত খণ্ডযুদ্ধৰ ফলত উত্তপ্ত পৰিস্থিতিৰ সৃষ্টি হয়।
গোলাঘাটতো বন্ধৰ সমৰ্থকে টায়াৰ জ্বলাই প্ৰতিবাদ সাৱ্যস্ত কৰে। গোলাঘাট নগৰৰ বেজবৰুৱা চাৰিআলিত আছুৱে এই প্ৰতিবাদী কাৰ্যসূচী ৰূপায়ন কৰিছে।
তেজপুৰতো অসম বন্ধৰ সৰ্বাত্মক প্ৰভাৱ পৰিছে। বন্ধৰ ফলত পুৱাৰে পৰা ৰাষ্ট্ৰীয় ঘাইপথৰ লগতে চহৰখনতো যান-বাহনৰ চলাচল বন্ধ আছে।
শিৱসাগৰত অসম বন্ধৰ ব্যাপক প্ৰভাৱ পৰিলক্ষিত হৈছে। ইয়াতো বন্ধ সমৰ্থকে ৰাজপথত টায়াৰ জ্বলাই প্ৰতিবাদ সাৱ্যস্ত কৰিছে। শিৱসাগৰৰ ৰাষ্ট্ৰীয় ঘাইপথৰ লগতে বিভিন্ন স্থানত বন্ধ সমৰ্থকে টায়াৰ জ্বলাই যাতায়ত স্তব্ধ কৰি তোলে।
নামনি অসমৰ গোৱালপাৰাতো অসম বন্ধৰ সৰ্বাত্মক প্ৰভাৱ পৰিছে। জিলাখনৰ দুধনৈ, দৰংগিৰি, আগিয়া, ৰংজুলি আদিত যান-বাহনৰ চলাচল, ব্যৱসায়িক প্ৰতিষ্ঠান আদি বন্ধ হৈ পৰিছে।
ইয়াৰ মাজতে দুই এটা বিক্ষিপ্ত ঘটনাৰ বাতৰিও পোৱা গৈছে। মুখ্য মন্ত্ৰীৰ গৃহ জিলা চাবুৱাত বন্ধ সমৰ্থকাৰীয়ে নৈশ বাছত শিল নিক্ষেপ কৰে। ইয়াতো অসম বন্ধৰ ফলত স্বাভাৱিক জীৱন যাত্ৰা ব্যহত হৈ পৰিছে।
