ঐতিহ্যমণ্ডিত কটন বিশ্ববিদ্যালয়ৰ ছাত্ৰ একতা সভাই নাগৰিকত্ব সংশোধনী বিধেয়কখনৰ বিৰোধিতাত আজিৰ পৰা অনিৰ্দিষ্টকালীন শ্ৰেনীবৰ্জন কাৰ্য্যসূচী ঘোষণা কৰাৰ পিছতে মাৰ্ঘেৰিটা মহাবিদ্যালয় ছাত্ৰ একতা সভায়ো অনিৰ্দিষ্টকালীন শ্ৰেণী বৰ্জনৰ সিদ্ধান্ত লয়।
সংবাদ মাধ্যমলৈ প্ৰেৰণ কৰা এটা প্ৰেছ বিজ্ঞপ্তিত মাৰ্ঘেৰিটা মহাবিদ্যালয়ৰ ছাত্ৰ একতা সভাৰ সভানেত্ৰী নিবিতা শৰ্মা, সম্পাদক অভিশেষ বৰুৱাই এই কথা জানিবলৈ দিছে।
“বিজেপি চৰকাৰে নাগৰিকত্ব সংশোধনী বিধেয়ক প্ৰৱৰ্তন কৰি অসম আৰু অসমীয়াৰ অস্তিত্ব ধ্বংসৰ যি অভিসন্ধি কৰিছে তাৰ বাবে আমি মাৰ্ঘেৰিটা মহাবিদ্যালয় ছাত্ৰ একতা সভাই ইয়াক তীব্ৰ ভাষাৰে গৰিহণা দিয়াৰ লগতে আজিৰে পৰা অনিৰ্দিষ্টকালীন শ্ৰেণীবৰ্জন ঘোষণা কৰিছো।” বিবৃতিটোত কোৱা হয়।
লগতে মহাবিদ্যালয়খনৰ ছাত্ৰ একতা সভাই এই শ্ৰেণী বৰ্জন কাৰ্য্যসূচীলৈ অসমপ্ৰেমী প্ৰতিজন ছাত্ৰ-ছাত্ৰীক পূৰ্ন সমৰ্থন আগ বঢ়াবলৈ আহ্বান জনাইছে।
উল্লেখযোগ্য যে অসম তথা উত্তৰ-পূবৰ জনগণৰ প্ৰবল আপত্তি সত্ত্বেও বিতৰ্কিত নাগৰিকত্ব সংশোধনী বিধেয়কখন ৮ জানুৱাৰিত লোকসভাত পাছ কৰে বিজেপি নেতৃত্বাধীন কেন্দ্ৰীয় চৰকাৰে। আজি বিধেয়কখন ৰাজ্যসভাত পাছ কৰাৰ চেষ্টা চলাব বিজেপিয়ে। অৱশ্যে ৰাজ্যসভাত শাসক দলৰ সংখ্যাগৰিষ্ঠতা নাই।