প্ৰধান মন্ত্ৰী মোডীয়ে আজি ৯ জানুৱাৰি বুধবাৰে অসমৰ লগতে উঃ পূৰ্বাঞ্চলৰ জনসাধাৰণক আশ্বাস প্ৰদান কৰিছে যে তেওঁলোকৰ অধিকাৰ সুৰক্ষিত কৰা হ’ব।
মহাৰাষ্ট্ৰৰ সোলাপুৰত অনুষ্ঠিত এটা অনুষ্ঠানত ভাষণ প্ৰদান কৰি প্ৰধান মন্ত্ৰী মোডীয়ে কৈছে, ‘‘বিধেয়কখনে পাকিস্তান, বাংলাদেশ আৰু আফগানিস্তানত বাস কৰা ভাৰত মাতাৰ পুত্ৰ-কন্যাসকলক ভাৰতীয় নাগৰিকত্ব প্ৰদানৰ বাট মুকলি কৰিছে। ইতিহাসৰ উত্থান পতনৰ সাক্ষী হোৱাৰ পাচত এই ভাই-ভনীসকলে ভাৰতৰ একান্ত অংশ হ’বলৈ বিচাৰিছে।
আনকি এই বিধেয়কখন লোকসভাত গৃহীত হ’লেও প্ৰধান মন্ত্ৰীয়ে উঃ পূবৰ জনসাধাৰণৰ অধিকাৰ সুৰক্ষিত ৰাখিব বুলি কৰা এই বক্তব্যই এই অঞ্চলৰ নাগৰিকৰ সন্দেহ কিঞ্চিৎ দূৰ কৰিব পাৰে।
অৰ্থনৈতিকভাৱে পিছপৰা সাধাৰণ বৰ্গৰ লোকসকলৰ বাবে ১০ শতাংশ সংৰক্ষণৰ বাবে সংবিধানৰ সংশোধনীৰ প্ৰসংগৰে প্ৰধান মন্ত্ৰী মোডীয়ে কৈছে যে এই ঐতিহাসিক পদক্ষেপে দৰিদ্ৰ সকলৰ উন্নতি কৰিব আৰু ইয়ে চৰকাৰৰ সবকা সাথ, সবকা বিকাশ নীতিৰ প্ৰতি থকা প্ৰতিশ্ৰুতিবদ্ধতাকেই প্ৰতিফলিত কৰিছে।
প্ৰধান মন্ত্ৰীগৰাকীয়ে কৈছে, ‘‘যোৱা কালি আমি সাধাৰণ বৰ্গৰ অৰ্থনৈতিকভাৱে পিছপৰা সকলৰ বাবে ১০ শতাংশ সংৰক্ষণৰ বাবে এই ঐতিহাসিক বিধেয়কখন লোকসভাত পাছ কৰাইছোঁ। ইয়ে আমাৰ চৰকাৰৰ সবকা সাথ, সবকা বিকাশ নীতিকেই শক্তিশালী কৰিছে।
