শিৱসাগৰ জিলাৰ গৌৰীসাগৰ আৰক্ষী থানাৰ অন্তৰ্গত চাৰিঙত আজি সন্ধিয়া সংঘটিত এক ভয়ংকৰ পথ দুৰ্ঘটনাত দুজন লোক থিতাতে নিহত হোৱাৰ লগতে দুজন গুৰুতৰভাৱে আহত হয়। নিহত যুৱক দুজনক ক্ৰমে দুলীয়া গাঁৱৰ প্ৰয়াত ৰজনী নেওগৰ জ্যেষ্ঠ পুত্ৰ উত্তম নেওগ আৰু মহেন্দ্ৰ নেওগৰ পুত্ৰ বিশ্বজিৎ নেওগ বুলি চিনাক্ত কৰা হৈছে।
জানিব পৰা মতে চাৰিং দুলীয়া গাঁও ৩৭ নং ৰাষ্ট্ৰীয় ঘাইপথৰ দাঁতিত ৰৈ থাকোতে যোৰহাট অভিমুখী এ এছ ০৬ এ ৬২২৪ নম্বৰৰ এখন দ্ৰুতবেগী পঞ্জাৱবডী ট্ৰাকে মহতিয়াই নিয়ে দুজনকৈ যুৱকক। ফলত উক্ত যুৱক দুজনে থিতাতে প্ৰাণ হেৰুৱালগীয়া হয়।
দুৰ্ঘটনা সংঘটিত কৰিয়েই তীব্ৰবেগী ট্ৰাকখন দ’ খাৱৈত পৰেগৈ। এই ঘটনাত একেখন গাঁৱৰে আন এজন যুৱক বুবুল দত্ত আৰু অ’ এন জি চিৰ অৱসৰপ্ৰাপ্ত কৰ্মচাৰী বদন নেওগ আঘাতপ্ৰাপ্ত হয়।
ইফালে দুৰ্ঘটনা সংঘটিত হোৱাৰ লগে লগে গৌৰীসাগৰ আৰক্ষী উপস্থিত হৈ আঘাতপ্ৰাপ্ত লোক দুজনক চিকিৎসালয়লৈ প্ৰেৰণ কৰাৰ লগতে মৃত যুৱক দুজনক মৰণোত্তৰ পৰীক্ষাৰ বাবে প্ৰেৰণ কৰে।
