অসম আৰক্ষীয়ে নিজাববীয়াকৈ তৰা “ৰাষ্ট্ৰদ্ৰোহ”ৰ গোচৰত শুকুৰবাৰে গুৱাহাটী উচ্চ ন্যায়ালয়ে জামিন প্ৰদান কৰিছে হীৰেন গোহাঁই, অখিল গগৈ আৰু মনজিত মহন্তক।
তিনিওজনকে অন্তৱৰ্তীকালীন জামিন প্ৰদান কৰি অহা ২২ জানুৱাৰিৰ পৰৱৰ্তী শুনানিত কে’ছ দায়েৰি দাখিল কৰাৰ বাবে আদালতে আৰক্ষীক নিৰ্দেশ দিছে।
বিজেপি চৰকাৰ উত্থাপিত নাগৰিকত্ব বিধেয়কৰ বিৰুদ্ধে প্ৰতিবাদী সভাত কৰা মন্তব্যক লৈ তেওঁলোকৰ বিৰুদ্ধে তৰা গোচৰক লৈ সৰ্বত্ৰ সমালোচিত হৈছিল সৰ্বানন্দ সোণোৱাল চৰকাৰ।
বিশেষকৈ বৰ্ষীয়ান বুদ্ধিজীৱীগৰাকীৰ সমৰ্থনত থিয় দিছিল বিজেপি ভিন্ন অসমৰ প্ৰায় সকলো দল-সংগঠন। #standwithhirengohain শীৰ্ষক এক ব্যাপক প্ৰচাৰো চ’চিয়েল মিদিয়াত আৰম্ভ হৈছিল।
গোহাঁইৰ লগতে অখিল গগৈ আৰু মনজিত মহন্তৰ বিৰুদ্ধে ভাৰতীয় দণ্ডবিধি আইনৰ ১২০ (বি)/২১২/১২৩/১২৪ (A) ধাৰাৰ অধীনত লতাশিল আৰক্ষীয়ে নিজাববীয়াকৈ (suo moto) ৰুজু কৰিছে এই গোচৰ (নং ১৫/২০১৯)।
আদালতত গোহাঁই আৰু অন্যান্যসকলৰ হৈ যুক্তি প্ৰদৰ্শন কৰে জ্যেষ্ঠ অধিবক্তা অৰূপ বৰবৰাই।
