ওদালগুৰিৰ ৰাইজৰ দীৰ্ঘদিনীয়া প্ৰয়োজন পূৰণ কৰি ওদালগুৰি জিলাৰ টংলা চহৰত উদ্বোধন হৈ গ’ল ডিজিটেল চলচ্চিত্ৰগৃহ। পুৰণা দীপ্তি চিনেমা হলটো পুনৰ্নিৰ্মাণ কৰি ছায়া চিনেমা হললৈ পৰিৱৰ্তিত কৰা হয়। টংলা ষ্টেট বেংকৰ ওপৰত এই চিনেমা হলটো নিৰ্মাণ কৰা হৈছে।
এই চিনেমা হলটোত ২৪২গৰাকী দৰ্শক বহাৰ সুবিধা আছে। শীত-তাপ নিয়ন্ত্ৰিত এই অত্যাধুনিক চিনেমা হলটোত আৰামদায়ক চকী আছে। ইয়াত ডাইমণ্ড, প্লেটিনাম আৰু গল্ড আৰু ছিলভাৰ এই ৪টা শ্ৰেণী আছে। ইয়াত এখন কাফেটেৰিয়াও আছে। এই চিনেমা হলটোত শেহতীয়াকৈ মুক্তি লাভ কৰা চলচ্চিত্ৰ প্ৰদৰ্শন কৰা হ’ব।
এই চলচ্চিত্ৰ হলত প্ৰৱেশ কৰা দৰ্শকে ধঁপাতকে আদি কৰি কোনো খোৱা বস্তু লৈ যাব নোৱাৰিব।
বিটিচিৰ চিনেমা আৰু সাংস্কৃতিক পৰিক্ৰমা কাৰ্যবাহী সদস্য বনজাৰ দৈমাৰীয়ে এই চিনেমা হলটো উন্মোচন কৰে আৰু জনসাধাৰণলৈ এই চিনেমা হলটো আগবঢ়োৱাৰ বাবে হলটোৰ মালিক ধানেশ্বৰ দৈমাৰীলৈ কৃতজ্ঞতা জনায়।
চিনেমা হলটোৰ টিকট ডাইমণ্ড শ্ৰেণীৰ বাবে ২৫০ টকা, প্লেটিনাম শ্ৰেণীৰ বাবে ১৫০ টকা আৰু গল্ড শ্ৰেণীৰ বাবে ১০০ টকা আৰু ছিলভাৰ শ্ৰেণীৰ বাবে ৭০ টকা। ওদালগুৰিৰ জনসাধাৰণ এই ডিজিটেল চিনেমা হলটোৰ বিষয়ত অতিপাত আগ্ৰহী। ছায়া চিনেমা হলটো সমগ্ৰ বিটিএডিৰ প্ৰথমটো ডিজিটেল চিনেমা হল।
