গুৱাহাটীবাসীক ২৪ ঘণ্টাই খোৱাপানী যোগান ধৰাৰ বাবে যোৱা ৮-৯ বছৰৰ ধৰি চলি থকা চাৰিটা পানী যোগান প্ৰকল্পৰ এতিয়াও বহু কাম বাকী থকাৰ সময়তে ‘পশ্চিম গুৱাহাটী পানী যোগান প্ৰকল্প’ৰ জৰিয়তে অহা মাৰ্চত গুৱাহাটীৰ একাংশ এলেকাত নামমাত্ৰ পানী যোগান ধৰাৰ প্ৰস্তুতি চলিছে।
গুৱাহাটী মহানগৰ খোৱাপানী আৰু অনাময় পৰিষদৰ এক উচ্চস্তৰী সূত্ৰই জনোৱা মতে শেহতীয়া পৰিকল্পনা অনুসৰি ‘পশ্চিম গুৱাহাটী পানী যোগান প্ৰকল্প’ই পশ্চিম গুৱাহাটী আৰু কেন্দ্ৰীয় গুৱাহাটীৰ একাংশ এলেকাতহে নামমাত্ৰ পানী যোগান ধৰিব।
তদুপৰি এই পানী ৰাইজে কেনেদৰে পাব আৰু পানীৰ দৰ কিমান হ’ব সেয়া এতিয়াও খোৱাপানী আৰু অনাময় পৰিষদে নিশ্চিত কৰিব পৰা নাই। আনহাতে যোগান ধৰিবলগীয়া খোৱাপানীৰ গুণগত মানৰ ওপৰতো প্ৰশ্ন উত্থাপন হৈছে। এতিয়ালৈকে খোৱাপানীৰ পৰিশোধনৰ বাবে কোনো ব্যৱস্থা নাই। আনকি পৰীক্ষাগাৰৰ নিবিদাকে আহ্বান কৰা হোৱা নাই।
কেন্দ্ৰীয় জনস্বাস্থ্য আৰু পৰিৱেশ কাৰিকৰী সংস্থা চমুকৈ চি পি এইচ ই ই অ’ৰ নিৰ্দেশাৱলী মতে, পৰীক্ষাগাৰটোত আইৰণ, বালি আদিৰ পৰিশোধনৰ ব্যৱস্থা থাকিব যদিও আৰ্ছেনিক আৰু জৈৱিক পদাৰ্থৰ পৰিশোধনৰ ব্যৱস্থা নাথাকিব। এনেক্ষেত্ৰত পানী যোগান প্ৰকল্পটোৰে যোগান ধৰিবলগীয়া এইধৰণৰ খোৱাপানী জনস্বাস্থ্যৰ বাবে কিমান নিৰাপদ হ’ব তাত নিশ্চয় সন্দেহৰ অৱকাশ থাকিব।
এই সন্দৰ্ভত নগৰ পানী যোগান আৰু পয়ঃপ্ৰণালী পৰিষদৰ অৱসৰপ্ৰাপ্ত মুখ্য অভিযন্তা সত্যব্ৰত শৰ্মাই কয় যে পানী যোগান প্ৰকল্পটোৰ পানীৰ পৰিশোধনৰ পৰীক্ষাগাৰটোত আৰ্ছেনিক আৰু জৈৱিক পদাৰ্থৰ উপস্থিতিৰ পৰীক্ষা কৰা ব্যৱস্থা থকাটো অতি জৰুৰী। কিছু বছৰ পূৰ্বে এটা পৰীক্ষাত গুৱাহাটীৰ ব্ৰহ্মপুত্ৰৰ পানীত আৰ্ছেনিৰ উপস্থিতি পোৱা গৈছিল।
আনহাতে নাম প্ৰকাশত অনিচ্ছুক পৰিষদৰ এটা সূত্ৰই জনাই যে অহা মাৰ্চৰ ভিতৰত প্ৰকল্পটোৰ জৰিয়তে পশ্চিম গুৱাহাটীৰ পাণ্ডুৰ চাৰিটা এলেকাৰ ৫ হাজাৰ মানুহক, কেন্দ্ৰীয় গুৱাহাটীৰ অমিয়নগৰ, চানমাৰি, শিলপুখুৰী আৰু কন্বাচল চাৰিটা এলেকাৰ ৩হাজাৰ মানুহক খোৱা পানী যোগান ধৰা হ’ব।
উল্লেখযোগ্য যে ২০০৯ চনতে কাম আৰম্ভ কৰা প্ৰকল্পটোৰে গুৱাহাটীৰ দক্ষিণ-পশ্চিম অঞ্চলৰ ৫ লাখ ৮০ হাজাৰ মানুহক পানী যোগান ধৰাৰ লক্ষ্য নিৰ্দ্ধাৰণ কৰা হৈছিল যদিও এতিয়া মাত্ৰ ৫ হাজাৰ মানুহকহে অৰ্থ্যাৎ এক শতাংশ লোককহে পানী যোগান ধৰা হ’ব। কাৰণ ২০১৩ চনতে স্থাপন কৰা মাধৱদেৱ নগৰ, গণেশপাৰা, বৰঝাৰ, জালুকবাৰী, মিৰ্জাপুৰৰ জলাধাৰৰ বহু কাম এতিয়াও অসম্পূৰ্ণ হৈয়ে আছে।
মাত্ৰ কামাখ্যা পাহাৰৰ জলাধাৰটোৰ কামহে সম্পূৰ্ণ হৈছে। ইয়াৰ জৰিয়তেই পশ্চিম গুৱাহাটী আৰু কেন্দ্ৰীয় গুৱাহাটীৰ একাংশ এলেকাত নামমাত্ৰ পানী যোগান ধৰা হ’ব।
ইপিনে চাৰিটা পানী যোগান প্ৰকল্পৰ তিনিটা প্ৰকল্প কেন্দ্ৰীয়, পূব আৰু উত্তৰ গুৱাহাটী প্ৰকল্পৰ কাম ব্যাপক অনিয়ম, দুৰ্নীতি আৰু লেহেমীয়া গতিৰে চলি আছে। যাৰ বাবে প্ৰকল্প তিনিটাৰ কাম সম্পূৰ্ণ হোৱাক লৈ চৰম অনিশ্চয়তাই দেখা দিছে। প্ৰকল্পকেইটাৰ পাইপ বহুওৱা, জলাধাৰ নিৰ্মাণ কৰা, জলাধাৰৰ লগত পানীৰ পাইপ সংযোগ কৰা, নদীৰপৰা পানী উত্তোলন কৰি মজুত ৰখা, ইনটেক নিৰ্মাণ কৰা, বিদ্যুৎ সংযোগ কৰা আদি বহু কাম আধৰুৱা হৈ পৰি আছে।
কেন্দ্ৰীয় আৰু উত্তৰ গুৱাহাটী পানী যোগান প্ৰকল্প দুটাৰ পানীৰ পাইপ বহুওৱাৰ কাম যোৱা ছমাহ ধৰি বন্ধ হৈ আছে। জাপানৰ জাইকা নামৰ বিত্তীয় প্ৰতিষ্ঠানৰপৰা ঋণ লৈ এই প্ৰকল্প দুটাৰ কাম কৰা হৈছিল।
যোৱা ২০০৯ চনৰ ৩১ মাৰ্চত প্ৰকল্প দুটাৰ সন্দৰ্ভত ভাৰত চৰকাৰ আৰু জাইকাৰ মাজত ঋণ চুক্তি সম্পাদন হৈছিল। জানিব পৰা মতে ঋণ চুক্তিৰ ম্যাদ অহা জুনত শেষ হোৱাৰ পিছত জাইকাই প্ৰকল্প দুটাৰ বাবে নিৰ্দ্ধাৰিত বাকী থকা ঋণ দিয়া বন্ধ কৰিব। ফলত এতিয়া কেন্দ্ৰীয় গুৱাহাটী আৰু উত্তৰ গুৱাহাটী প্ৰকল্প দুটাৰ কামত গভীৰ অনিশ্চয়তাই দেখা দিছে।
যোৱা বছৰ ২৩ ফেব্ৰুৱাৰীতে দক্ষিণ কেন্দ্ৰীয় গুৱাহাটী আৰু উত্তৰ গুৱাহাটী প্ৰকল্প দুটাৰ পানীৰ পাইপ বহুওৱাৰ দায়িত্বত থকা হায়দৰাবাদৰ কোম্পানী আই ভি চি আৰ এলক হায়দৰাবাদস্থিত নেচনেল কোম্পানী ল ট্ৰিবিউনেল চমুকৈ এন চি এল টিয়ে দেউলীয়া ঘোষণা কৰাৰ পিছৰপৰা প্ৰকল্প দুটাৰ পানীৰ পাইপ বহুওৱাৰ কাম বন্ধ হৈ আছে।
প্ৰকল্পৰ বাবে ৰাজ্য চৰকাৰে ৯৫০ কিলোমিটাৰ পথত কোম্পানীটোক পানীৰ পাইপ বহুওৱাৰ বাবে ৮০০ কোটি টকা মোকলাই দিছিল। কোম্পানীটোৱে পানীৰ পাইপ বহুওৱাৰ কাম ৬৫ শতাংশ সম্পূৰ্ণ কৰি দেউলীয়া ঘোষণা হোৱাৰ পিছত কোম্পানীটোৱে বাকী থকা কাম বাদ দি উধাও হৈছে।
ইপিনে, এছিয়ান ডেভেলপমেণ্ট বেংকৰপৰা ঋণ লৈ ২০১১ চনতে কাম আৰম্ভ কৰা দক্ষিণ-পূব গুৱাহাটীৰ পানীৰ পাইপ বহুওৱাৰ কাম বন্ধ হৈ থকাৰ লগতে নিৰ্দ্ধাৰিত কেইবাটাও জলাধাৰৰ নিৰ্মাণৰ কামো বন্ধ হৈ আছে। তথ্য মতে প্ৰকল্পটোৰ কাম এতিয়ালৈ ২০ শতাংশহে হৈছে। এনেদৰে বছৰ বছৰ ধৰি চৰম অনিয়ম আৰু অৱহেলাৰে গুৱাহাটী পানী যোগান প্ৰকল্পৰ কাম চলি আছে।
