অসমীয়া চীনা সম্প্ৰদায়ে নাগৰিকত্ব (সংশোধনী) বিধেয়কৰ বিৰুদ্ধে নিজৰ মত প্ৰকাশ কৰিছে। অতি কম সংখ্যক মানুহে জনা তিনিচুকীয়াৰ মাকুমকে ধৰি উজনি অসমৰ কিছু কিছু এলেকাত বাস কৰা অসমীয়া চীনা সমপ্ৰদায়ৰ লোকসকলে বিতৰ্কিত নাগৰিকত্ব বিধেয়কখনৰ বিৰুদ্ধে সোচ্চাৰ হৈ পৰিছে।
স্বাধীনতাৰ সময়চোৱাত প্ৰায় ৫০০ জনসংখ্যাৰ অতি সংখ্যালঘূ এই সমপ্ৰদায়টোৱে নিজকে অসমীয়া জাতিৰ অংশ হিচাপে পৰিচয় দি অসমকে নিজৰ গৃহভূমি বুলি আকোঁৱালি লৈছিল যদিও ১৯৬৭ৰ চীন-ভাৰত যুদ্ধৰ সময়ত বহুতো চীনা লোকক খেদি পঠোৱা হয়। অতি সীমিত জনসংখ্যাৰ এই সম্প্ৰদায়টোক সংখ্যালঘূ জনগোষ্ঠীৰ মৰ্যাদা প্ৰদান কৰা হোৱা নাই। দৰাচলতে, নিৰ্বাচনৰ ফলাফলক প্ৰভাৱিত কৰাৰ বাবে জনবল নথকা হেতুকেই এই সম্প্ৰদায়টো আজিও ইয়াৰ প্ৰাপ্য সুযোগ সুবিধাৰ পৰা বঞ্চিত হৈ আছে।
য়ুজিন থাম নামৰ তৃতীয় প্ৰজন্মৰ চীনা লোকগৰাকীয়ে কৈছে যে তেওঁলোকে নিজকে অসমীয়া সমাজৰ সৈতে মিলাই দিছে আৰু অসমক তেওঁলোকে সৰ্বান্তঃকৰণেৰে নিজৰ গৃহৰাজ্য হিচাপে গণ্য কৰে আৰু নাগৰিকত্ব বিধেয়কৰ সমৰ্থন কৰা সকলক তেওঁলোকে সমৰ্থন কৰে।
ভিকি লী নামৰ অসমীয়া চীনা লোকজনে কৈছে যে যদিহে বিধেয়কখন আইন হৈ পৰে, তেতিয়া অসমৰ অৱস্থা ত্ৰিপুৰাৰ দৰে হৈ পৰিব আৰু সেয়া ৰাজ্যখনৰ খিলঞ্জীয়া লোকসকলৰ বাবে সমস্যা হৈ পৰিব।
তেজপুৰৰ উইং হিম থাম নামৰ সত্তৰোৰ্ধৰ দ্বিতীয় প্ৰজন্মৰ অসমীয়া চীনা লোকজনে কৈছে যে বিধেয়কখনৰ বিষয়টো অতি গভীৰ। এই বিধেয়কখনৰ বিৰুদ্ধে গঢ়ি উঠা আন্দোলনে যাতে জনসাধাৰণৰ জীৱন বিপন্ন নকৰে তাৰ প্ৰতি লক্ষ্য ৰাখিব লাগিব। তেওঁ আৰু কৈছে যে সঠিক ৰাইজৰ প্ৰতিনিধিক নিৰ্বাচন কৰাটো জনসাধাৰণৰ এটা দায়িত্ব।
উল্লেখ্য যে, প্ৰায় এটা সতিকাৰ পূৰ্বে চাহ বাগিচাত কাম কৰাৰ বাবে বৃটিছসকলে চীনৰ পৰা এই লোকসকলক লৈ আহিছিল। তাৰ পাছত চীনৰ পৰা প্ৰব্ৰজন কৰা এই লোকসকল বৈবাহিক সূত্ৰত বান্ধ খাই অসমীয়া সমাজত জীণ যায়, আনকি কিছু সংখ্যকে আনকি চীনা উপাধি ত্যাগ কৰি অসমীয়া উপাধিও গ্ৰহণ কৰিছে।
