আজি লখিমপুৰৰ ডেজু চাহ বাগানত এটা বিনামূলীয়া চকু পৰীক্ষা আৰু চকুত ছানি পৰা ৰোগ চিনাক্তকৰণ শিবিৰৰ আয়োজন কৰা হয়। তেল আৰু প্ৰাকৃতিক গেছ আয়োগৰ ছিচিয়েল ৰেস্পনচিবিলিটী অভিযানৰ অন্তৰ্গত জিলা অন্ধতা নিয়ন্ত্ৰণ সমাজ, লখিমপুৰ আৰু লখিমপুৰৰ লায়নছ ক্লাবৰ সহযোগত এই চিকিৎসা শিবিৰৰ আয়োজন কৰিছে অনুগ্ৰহ দৃষ্টিদানে।
এই শিবিৰত ৰোগীসকলৰ মাজত বিনামূলীয়াকৈ চশমা আৰু ঔষধ বিতৰণ কৰা হয়। এই শিবিৰত ৭৯ গৰাকী ৰোগীক চকুত ছানি পৰা ৰোগৰ অস্ত্ৰোপচাৰ কৰাৰ বাবে নিৰ্বাচিত কৰা হয়। ৰোগীসকলক ডিব্ৰুগড়ৰ লায়ন কে কে চহৰীয়া চকু চিকিৎসালয়ত চিকিৎসা কৰোৱা হ’ব। ৰোগীসকলক বিনামূলীয়াকৈ চিকিৎসালয়লৈ নিয়া-অনা কৰাৰ বাবে চাহ বাগান কৰ্তৃপক্ষই দুখন বাছৰো যোগান ধৰে।
ডেজু চাহ বাগানৰ চিকিৎসা বিষয়া ড০ আৰ মিশ্ৰৰ সহযোগত এই শিবিৰটোৰ আয়োজন কৰিছে দিল্লীৰ অনুগ্ৰহ দৃষ্টিদানৰ ড০ সঞ্জয় অটোৱালে। আছাম ট্ৰিবিউন কাকতৰ সৈতে হোৱা এটা সাক্ষাৎকাৰত ড০ অটৱালে কৈছে যে তেওঁলোকৰ দলটোৱে লখিমপুৰ, ধেমাজি আৰু ডিব্ৰুগড় জিলাত ৬০০ চকুত ছানি পৰা ৰোগৰ অস্ত্ৰোপচাৰ কৰাৰ পৰিকল্পনা কৰিছে।
উল্লেখ্য যে, চকুত ছানি পৰা ৰোগীসকলক কঢঢ়িয়াই নিয়া বাছ দুখনৰ ফ্লেগ অফ কৰে ডেজু চাহ বাগানৰ জ্যেষ্ঠ পৰিচালক জ্যোতিৰ্ময় কাকতীয়ে।
