আজি দিনৰ প্ৰায় ১১ মান বজাত শিৱসাগৰ চহৰৰ মাজমজিয়াৰ পৰা দুজন অচিনাক্ত দুৰ্বৃত্তই এজন লোকৰ পৰা তিনি লাখ টকা লুটি লৈ যায়। এই ডকাইতি কাণ্ড ঘটনা সংঘটিত হোৱাৰ পাছতে তীব্ৰ চাঞ্চল্যৰ সৃষ্টি হৈছে সমগ্ৰ চহৰখনত।
ঘটনাৰ বিৱৰণি মতে, আজি দিনৰ প্ৰায় ১১.৩০ বজাত এন ই পেইন্ট নামৰ এটা প্ৰতিষ্ঠানৰ কৰ্মচাৰী গৌতম বড়োৱে চহৰৰ কেন্দ্ৰীয় বজাৰৰ সমীপত থকা এলাহাবাদ বেংকৰ পৰা তিনি লাখ টকা উলিয়াই নিজৰ স্কুটিৰে আহি আছিল। চহৰৰ ৰাজ্যিক পৰিবহন অৱস্থানৰ সমীপত এটা ডিভাইদাৰ পাৰ হওঁতেই ক’লা ৰঙৰ পালচাৰ বাইকত অহা দুজন দুৰ্বৃত্তই বড়োৰ পৰা টকাৰ বেগটো কাঢ়ি লৈ তীব্ৰ বেগেৰে উধাও হয়। স্কুটি লৈ গৌতম বড়োৱে কিছু দূৰ খেদি যায় যদিও দুৰ্বৃত্তক ধৰিবলৈ সক্ষম নহ’ল।
ঘটনাৰ সন্দৰ্ভত প্ৰতিষ্ঠানটোৰ মালিক গোপাল যোশীয়ে শিৱসাগৰ সদৰ থানাত এজাহাৰ দাখিল কৰিছে যদিও এই পৰ্যন্ত আৰক্ষীয়ে দুৰ্বৃত্তক কৰায়ত্ত কৰিবলৈ সক্ষম হোৱা নাই। ইফালে কৰ্মচাৰীক দৰমহা দিবৰ বাবে উক্ত তিনিলাখ টকা বেংকৰ পৰা উলিয়াই আনিছিল বুলি প্ৰকাশ কৰে এন ই পেইন্টৰ স্বত্বাধিকাৰীজনে।
উল্লেখ্য যে এলাহাবাদ বেংকৰ এই শাখাটোৰ পৰা ইয়াৰ পূৰ্বে কেইবাবাৰো এনেদৰে দুৰ্বৃত্তই গ্ৰাহকৰ পৰা টকা কাঢ়ি নিছে যদিও আজিলৈকে এটাও দুৰ্বৃত্তক কৰায়ত্ত কৰিব পৰা নাই শিৱসাগৰ আৰক্ষীয়ে।
কোন গ্ৰাহকে কিমান টকা উলিয়াইছে সেই তথ্য দুৰ্বৃত্তই কেনেদৰে লাভ কৰে তাক লৈ এতিয়া বিভিন্ন লোকে প্ৰশ্নৰ উত্থাপন কৰিছে। আনহাতে আৰক্ষীৰ সঠিক তদন্তত এই দিন ডকাইতি ঘটনাৰ লগত কোন লোক জড়িত হৈ আছে সেই সকলো ওলাই পৰিব বুলিও স্থানীয় ৰাইজে উল্লেখ কৰে।
