কাৰ্বি আংলং আবকাৰী বিভাগে চিলনিজানত ৩৯ নং ৰাষ্ট্ৰীয় ঘাইপথত ট্ৰাকভৰ্তি দেশীয়ভাৱে প্ৰস্তুত বিদেশী সুৰা (IMFL ) জব্দ কৰিছে। কাৰ্বি আংলং স্বায়ত্ত শাসিত পৰিষদৰ আবকাৰী বিভাগে চলোৱা এটা নিয়মীয়া তালাচীৰ সময়ত এই সুৰাখিনি জব্দ কৰে। অবৈধ সুৰাখিনি পৰিবহণ কৰি অনা ট্ৰাকখনৰ পঞ্জীয়ন নম্বৰ হৈছে AS 09AC 5747।
ট্ৰাকখনৰ পৰা মুঠ ১২০০ কেছ সুৰা উদ্ধাৰ কৰা হয়। ইয়াৰ পূৰ্বে আবকাৰী বিভাগক উক্ত ট্ৰাকখনৰ সন্দৰ্ভত এটা নিৰ্ভৰযোগ্য সূত্ৰই তথ্যৰ যোগান ধৰিছিল। উক্ত ট্ৰাকখনে এই সুৰাখিনি অৰুণাচলৰ বৰডুমছাত জমা দিবলৈ নি আছিল। কিন্তু ই নুমলীগড় সংযোগপথত যাত্ৰাপথ সলনি কৰি ৩৯ নং ৰাষ্ট্ৰীয় ঘাইপথেৰে নাগালেণ্ডৰ ডিমাপুৰ অভিমুখে গৈ আছিল।
আৰক্ষীৰ লোকৰ যথেষ্ট অভাৱত থকা স্বত্তেও কাৰ্বি আংলং স্বায়ত্ত শাসিত পৰিষদৰ আবকাৰী বিভাগে স্থানীয় লোকক নিয়োগ কৰি তেওঁলোকৰ নতুন তালাচী চকীসমূহত কামত মকৰল কৰি আহিছে আৰু ইয়ে বিভাগটোৰ দক্ষতাৰ ওপৰত প্ৰশ্নৰো উদ্ৰেক কৰিছে।
তাৎপৰ্যপূৰ্ণভাৱে এই অবৈধ সুৰাখিনিৰ সৈতে অগষ্টাইন ক্ৰামছা নামৰ এগৰাকী প্ৰাক্তন বিদ্ৰোহী নেতাৰ নাম সাঙোৰ খাই পৰিছে আৰু তেওঁক লৈ আলোচনা হৈছে। উল্লেখ্য যে অবৈধ কয়লা খনন বা অবৈধ সুৰাই হওক সকলো ধৰণৰ বৃহৎ কেলেংকাৰিত ক্ৰামছাৰ নাম উঠি আহেই। তাৎপূৰ্ণভাৱে অগষ্টাইন ক্ৰামছা হৈছে অসমৰ পাৰ্বত্য এলেকা উন্নয়ন মন্ত্ৰী ছুম ৰংহাং আৰু কাৰ্বি আংলং স্বায়ত্ত শাসিত পৰিষদৰ আবকাৰী বিভাগৰ কাৰ্যবাহী সদস্য অমৰছিং টিছোৰ সোঁহাতস্বৰূপ।
