আছুৰ ধেমাজি জিলা গোটে অসমৰ বিত্ত, স্বাস্থ্য আৰু পৰিয়াল কল্যাণ আৰু গড়কাপ্তানি মন্ত্ৰী ড০ হিমন্ত বিশ্ব শৰ্মাক তেওঁৰ ধেমাজি ভ্ৰমণৰ সময়চোৱাত কোনো প্ৰৰোচনামূলক মন্তব্য কৰাৰ পৰা বিৰত থকাৰ বাবে আহ্বান জনাইছে।
উল্লেখ্য যে মে-ডৈআম-মে-ফি উৎসৱত অংশগ্ৰহণ কৰিবলৈ আজি ৩১ জানুৱাৰি বৃহস্পতিবাৰে মন্ত্ৰী ড০ হিমন্ত বিশ্ব শৰ্মা ধেমাজিলৈ আহিব।
এটা সংবাদ বিজ্ঞপ্তি যোগে আছুৰ ধেমাজি গোটটোৱে ড০ শৰ্মাক দোষাৰোপ কৰিছে যে তেওঁ নাগৰিকত্ব (সংশোধনী) বিধেয়ক, ২০১৬ৰ বিৰুদ্ধে ৰাজ্যখনত চলি থকা প্ৰতিবাদ মষিমুৰ কৰিবলৈ প্ৰৰোচনামূলক মন্তব্য কৰি আহিছে।
ছাত্ৰ সংগঠনটোৱে ড০ শৰ্মাক এজন ফেচীবাদী চৰিত্ৰৰ নেতা বুলি অভিহিত কৰে আৰু মত প্ৰকাশ কৰে যে আগন্তুক নিৰ্বাচনত বিজেপি দল আৰু ড০ শৰ্মাই এটা অশান্তি জৰ্জৰ ৰাজনৈতিক পৰিস্থিতিৰ মাজত পৰিব।
আছুৱে ধেমাজি চহৰকে ধৰি জিলাখনৰ বিভিন্ন স্থানত ড০ শৰ্মাৰ জুমুঠি ওলোমাই ৰাখিছে। উল্লেখ্য যে সোমবাৰে নলবাৰীত বিজেপিৰ গুণ্ডা বাহিনীয়ে আছুৰ সদস্যৰ ওপৰত সংঘটিত কৰা আক্ৰমণৰ প্ৰতিবাদত ধেমাজিত ধৰ্ণা কাৰ্যসূচীৰ আয়োজন কৰিছিল ছাত্ৰ সংগঠনটোৱে।
স্মৰ্তব্য নাগৰিকত্ব (সংশোধনী) বিধায়ক, ২০১৬ বিৰুদ্ধে যোৱা যে ২৭ জানুৱাৰিত আছু সদস্যসকলে নলবাৰীত বিজেপিৰ বৰমূৰীয়াসকললৈ ক’লা পতাকা জোকাৰিছিল। থানাৰ ভিতৰতেই আছুৰ পতাকাক অসন্মান কৰাৰ লগতে আছু কৰ্মীসকলক মাৰধৰ কৰাৰ বাবে আছুৰ নেতৃবৃন্দই বিজেপিৰ গুণ্ডা বাহিনীক তীব্ৰ ভাষাৰে ককৰ্থনা কৰে।
