চৰকাৰৰ বিধায়ক মন্ত্ৰীসকলক জাগ্ৰত কৰাৰ প্ৰয়াসেৰে বহস্পতিবাৰে ক’লা বস্ত্ৰ পৰিধান কৰি এক সংবাদমেল সম্বোধন কৰে প্ৰব্ৰজন বিৰোধী মঞ্চৰ আহ্বায়ক উপমন্যু হাজৰিকাই।
মহানগৰীৰ গুৱাহাটী ক্লাৱস্থিত প্ৰাদেশিক মহিলা সমিতিৰ সভা কক্ষত ক’লা বস্ত্ৰ পৰিধান কৰি সম্বোধন কৰা সংবাদমেলত হাজৰিকাই কয়, ‘’ক’লা বস্ত্ৰই হওঁক প্ৰতিবাদৰ ভাষা। যাতে চৰকাৰে বুজি উঠক যে ভূমি, চৰকাৰী সংৰক্ষণেহে আমাক সংৰক্ষিত কৰিব।‘’
কিন্তু ক’লা কাপোৰ বা ক’লা বস্ত্ৰৰ প্ৰতিহে ভয়ত মুখ্য মন্ত্ৰীকে ধৰি চৰকাৰৰ অন্য মন্ত্ৰী-বিধায়কসকল বিতত হোৱা দেখিবলৈ পোৱা গৈছে বুলি উক্ত সংবাদমেলত হাজৰিকাই মন্তব্য কৰে।
ইপিনে, মুখ্য মন্ত্ৰী, মন্ত্ৰীসকল ক’লা পতাকাৰ প্ৰতি ভয় কৰাৰ কাৰণ বাখ্যা কৰি তেওঁ কয়, ‘‘কাৰণ তেওঁলোকে এতিয়া প্ৰতিবাদৰ সকলো ভাষাই অগ্ৰাহ্য কৰিছে । বছৰ ধৰি সংশোধনী আইনৰ বিৰুদ্ধে তীব্ৰ আন্দোলনেও তেওঁলোকৰ গা লৰাব পৰা নাই।‘’
‘’কণমানি শিশু এটাইয়ো এইক্ষেত্ৰত ৰেহাই নোপোৱা হৈছে।‘‘ মুখ্য মন্ত্ৰীৰ সভাত ক’লা কাপোৰৰ সন্ত্ৰাসৰ বলি হোৱা কণমানিটোৰ সন্দৰ্ভত এইদৰে কয় উপমন্যু হাজৰিকাই।
আনহাতে, যোৱা তিনিমাহ ধৰি প্ৰব্ৰজন বিৰোধী মঞ্চৰ তৰফৰ পৰা এক গণ প্ৰচাৰ অভিযান চলাই থকা বুলি সদৰী কৰে হাজৰিকাই।
তেওঁ কয়, ‘’প্ৰচাৰ অভিযানৰ মূল লক্ষ্য হৈছে অসমৰ সমস্যা বাংলাদেশী নহয়, অসমৰ সমস্যা অসমৰ নেতাসকল।‘’
১৯৫১ চনক ভিত্তিবৰ্ষ হিচাপে লৈ চৰকাৰী চাকৰি, সা-সুবিধা সংৰক্ষণৰ ৰক্ষাকৱচ প্ৰদান, এনআৰচিৰ পুনঃৰীক্ষণ, নতুনকৈ বিদেশী বোজা নলওঁ বুলি বিধান সভাত প্ৰস্তাৱ গ্ৰহণ কৰি কেন্দ্ৰীয় চৰকাৰলৈ প্ৰেৰণ কৰা, এই তিনিটাই হৈছে এই প্ৰচাৰ অভিযানৰ মূল লক্ষ্য।
ইতিমধ্যে, তেজপুৰৰ পৰা চিলাপথাৰলৈকে, শদিয়াৰ পৰা বকোলৈকে গাঁৱে গাঁৱে গৈ ৬ লক্ষাধিক গোহাৰি পত্ৰ ইতিমধ্যে বিতৰণ কৰা হৈছে বুলি সংবাদমেলত সদৰী কৰে উপমন্যু হাজৰিকাই।
