অসমত আৰু এজন উদ্ধৱ ভৰালীৰ জন্ম হ’ল নেকি! বিশ্বৰ বৃহৎ বৃহৎ গাড়ী নিৰ্মাতা প্ৰতিষ্ঠান সমূহৰ মাজত পৰিবেশ অনুকূল গাড়ী নিৰ্মাণৰ প্ৰতিযোগিতা চলি থকাৰ সময়তে অসমৰ মঙলদৈ জিলাৰ এজন ২১ বছৰীয়া কলেজীয়া ছাত্ৰই অসাধ্য সাধন কৰি সম্পুৰ্ণ ব্যক্তিগত প্ৰচেষ্টাৰে নিৰ্মাণ কৰি উলিয়ালে পানীৰ পৰা ইন্ধন আহৰণ কৰি ভাপশক্তিৰে চলাচল কৰিব পৰা এখন পৰিবেশ অনুকূল বাহন।
মঙলদৈ জিলাৰ ঘাটোৱাপাৰা গাঁৱৰ নিৱাসী প্ৰসন্ন ডেকাই ছমাহযোৰা কষ্ট আৰু সাধনাৰে নিৰ্মাণ কৰি উলিয়াইছে এনে এখন বাহন। স্থানীয় এখন মহাবিদ্যালয়ৰ স্নাতক দ্বিতীয় ষাণ্মাসিকৰ ছাত্ৰ প্ৰসন্ন ডেকাই নিৰ্মাণ কৰি উলিওৱা পৰিবেশ অনুকূল বাহন খনৰ নাম দিছে H2O (পানীৰ বৈজ্ঞানিক সংকেত)। সাংবাদিকৰে সৈতে হোৱা কথা-বতৰাত প্ৰসন্নই এই প্ৰকল্পটো বাস্তৱ ৰূপ দিয়াৰ ক্ষেত্ৰত ৫৫ বাৰ বিফল হৈছিল বুলি উল্লেখ কৰি ইয়াক সম্পূৰ্ণ কৰাৰ ক্ষেত্ৰত প্ৰায় ৮৫০০০ টকা ব্যায় হোৱা বুলি সদৰী কৰে।
নিজৰ সপোনৰ প্ৰকল্পটোৰ কাম সম্পূৰ্ণ কৰাৰ বাবে অসমৰ প্ৰতিভাৱান তৰুণজনে টকাৰ বাবে মহাবিদ্যালয় কেণ্টিনত অংশকালীনভাৱে কাম কৰিছিল আৰু প্ৰসন্নৰ মাতৃয়ে পুত্ৰৰ সপোন পুৰণ কৰাৰ বাবে এটা ব্যাক্তিগত প্ৰতিষ্ঠানৰ পৰা ঋণ পৰ্যন্ত ল’বলগীয়া হৈছিল। ধনৰ বাবে প্ৰকল্পটো আৰু অধিক উন্নত কৰি তোলাৰ ক্ষেত্ৰত সীমাবদ্ধতা আহি পৰা বুলিও প্ৰসন্নই জানিবলৈ দিয়ে।
অসমৰ ছাত্ৰ এজনৰ এই উদ্ভাৱনে এতিয়া স্থানীয় ৰাইজৰ মাজত চৰ্চা লাভ কৰিছে আৰু ৰাজ্যবাসীলৈ আশাৰ বতৰা কঢ়িয়াই আনিছে।
