নাগৰিকত্ব সংশোধনী বিধেয়ক ২০১৬ যদি ৰাজ্যসভাত গৃহীত হয় তেতিয়াহ’লে সদৌ অসম ছাত্ৰ সন্থা (আছু) উচ্চতম ন্যায়ালয়লৈ যাব। আছুৰ সাধাৰণ সম্পাদক লুৰীণজ্যোতি গগৈয়ে মঙলবাৰে এই কথা জানিবলৈ দিয়ে।
সদনৰ কাৰ্যক্ৰমণিকা অনুসৰি আজি দিনৰ ১২ বজাত কেন্দ্ৰীয় গৃহ মন্ত্ৰী ৰাজনাথ সিঙে ৰাজ্যসভাত উত্থাপন কৰাৰ কথা আছিল যদিও বিয়লিলৈ সদন স্থগিত ৰখাৰ বাবে এতিয়াও বিধেয়কখন সদনত উত্থাপিত হোৱা নাই।
বিধেয়কখন ৰাজ্যসভাত উত্থাপিত হ’লে সদনত হুলস্থুল হোৱাৰ বাবে বিধেয়কখন সম্পৰ্কত আজি আলোচনা নহ’বও পাৰে। মঙলবাৰে বিধেয়কখন সন্দৰ্ভত আলোচনা নহ’লে সেয়া বুধবাৰলৈকে স্থগিত ৰখাৰ সম্ভাৱনা আছে।
উল্লেখযোগ্য যে অসমৰ সকলো জাতীয় তথা খিলঞ্জীয়া দল-সংগঠনে নাগৰিকত্ব বিধেয়কখনৰ বিৰোধিতা কৰি অহাৰ লগতে লোকসভাত বিধেয়কখন গৃহীত হোৱাৰ পাছত ৰাজ্যখনত ব্যাপক প্ৰতিবাদ সাৱ্যস্ত হৈছে।
ইপিনে, বিধেয়কখনৰ বিৰুদ্ধে ৰাজ্যখনত জনমত গঠন কৰাৰ উপৰি আছুৱে নতুন দিল্লীতো বিধেয়কখনৰ ৰাজ্যসভাত বিৰোধিতা কৰিবলৈ বিভিন্ন বিৰোধী ৰাজনৈতিক দলক আহ্বান জনাইছে।
