নাগৰিকত্ব সংশোধনী বিধেয়কক কেন্দ্ৰ কৰি কিছু দিন পূৰ্বলৈকে সমগ্ৰ উত্তৰ-পূব আন্দোলন-প্ৰতিবাদেৰে উত্তাল হৈ আছিল। প্ৰায় দুবছৰ ধৰি উত্তৰ-পূবৰ ভাষা সংস্কৃতি তথা অস্তিত্ব ৰক্ষাৰ স্বাৰ্থত উত্তৰ-পূববাসীয়ে আন্দোলন প্ৰতিবাদ কৰি আছিল।
জাতি ৰক্ষাৰ স্বাৰ্থত গুৱাহাটীত অসমীয়া যুৱকে উলংগ হৈ প্ৰতিবাদ সাব্যস্ত কৰাৰ লগতে ইম্ফলত উলংগ প্ৰতিবাদ সাব্যস্ত কৰিছিল কেইবাজনেও।
তাৰ পাছতো গুৱাহাটীত আহি অমিত শ্বাহৰ ঘোষণা ‘‘মোদী নেতৃত্বাধীন বিজেপি চৰকাৰ শাসনলৈ অহাৰ পাছত উত্তৰ-পূৰ্বাঞ্চলৰ পৰা আন্দোলন নাইকিয়া হ’ল। আগতে পথ অৱৰোধ হৈছিল, ধৰ্ণা হৈছিল এতিয়া উত্তৰ-পূবত সেইবোৰ দেখিবলৈ পোৱা নাযায়।‘
নিজৰ বক্তব্যৰ মাজতে গুৱাহাটীৰ বশিষ্ঠ চাৰিআলিত বিজেপিৰ ৰাষ্ট্ৰীয় সভাপতি অমিত শ্বাহৰ এই অদ্ভুত মন্তব্যই বিশেষ তাৎপৰ্য্য বহন কৰিছে। কিয়নো তেওঁ ভাষণত উল্লেখ কৰা ‘ধৰ্ণা, পথ অৱৰোধ’ এই দুটা উত্তৰ-পূৰ্বাঞ্চলত নাগৰিকত্ব সংশোধনী বিধেয়কক কেন্দ্ৰ কৰি সঘনাই সংঘটিত হৈছিল।
তাৎপয্যপূৰ্ণভাৱে ৰাজ্যসভাত নাগৰিকত্ব সংশোধনী বিধেয়কখন উত্থাপন নোহোৱাক কেন্দ্ৰ কৰি উত্তৰ-পূৱবাসীয়ে সাময়িক সকাহ লাভ কৰাৰ সময়তে অমিত শ্বাহে অসমৰ দুখনকৈ জনসভাত ‘বিজেপি চৰকাৰ শাসনলৈ আহিলে পুনৰ নাগৰিকত্ব সংশোধনী বিধেয়কখন গৃহীত হ’ব’ বুলি ঘোষণা কৰাৰ পাছতেই পুনৰ এই বিধেয়কৰ বিৰুদ্ধে উত্তৰ-পূব উত্তাল হোৱাৰ সম্ভাৱনা নুই কৰিব নোৱাৰি।
তদুপৰি, জাতিধ্বংসী বিধেয়কক কেন্দ্ৰ কৰি মিত্ৰ দল অগপই বিজেপিৰ মিত্ৰতা ত্যাগ কৰিলেও কৰ্মৰ জৰিয়তে উত্তৰ-পূবক নৰেন্দ্ৰ মোদীয়ে অতি শান্তিপূৰ্ণভাৱে আগুৱাই নিছে বুলি দাবী বিজেপিৰ ৰাষ্ট্ৰীয় সভাপতিগৰাকীৰ।
‘নাগৰিকত্ব সংশোধনী বিধেয়কক বাদ দি উত্তৰ-পূবৰ উন্নয়ন কল্পনা কৰিব নোৱাৰি তথা একেবাৰেই সম্ভৱ নহয়। ২০১৯ চনত লোকসভা আৰু ৰাজ্যসভাত সংখ্যাগৰিষ্ঠ আসন লৈ বিজেপি চৰকাৰে এই বিধেয়কখন গৃহীত কৰিবই।‘ ব্ৰহ্মপুত্ৰ উপত্যকাত বিধেয়কক লৈ চলা ব্যাপক গণ আন্দোলনক ভেঙুচালি কৰি এই মন্তব্য ৰাষ্ট্ৰীয় সভাপতি শ্বাহৰ।
ইপিনে, ভাষণৰ প্ৰত্যেকটো শাৰীতে বিজেপি চৰকাৰৰ কামৰ খতিয়ান দাঙি ধৰি সভাপতিগৰাকীয়ে প্ৰধান মন্ত্ৰী নৰেন্দ্ৰ মোদীৰ প্ৰশংসাত পঞ্চমুখ হৈ পৰে। আনকি উত্তৰ-পূবৰ বাবে নৰেন্দ্ৰ মোদীৰ অৱদান যথেষ্ট বুলি দাবী কৰে শ্বাহে।
এই অৱদানৰ ভিতৰত সন্ত্ৰাসবাদ মুক্ত উত্তৰ-পূব অন্যতম বুলিও দাবী শ্বাহৰ।
‘পাঁচ বছৰৰ আগলৈকে উত্তৰ-পূবত গুলি ফুটিছিল, আই ই ডি বিস্ফোৰণ হৈছিল আৰু চাৰিওফালে সন্ত্ৰাসবাদীয়ে অশান্তিকৰ পৰিবেশৰ সৃষ্টি কৰিছিল। মোদী শাসনলৈ অহাৰ পাছত সমগ্ৰ উত্তৰ-পূবৰ পৰা বোমা-বিস্ফোৰণ, গুলিচালনাৰ ঘটনা সংঘটিত নোহোৱা হ’ল। আজি উত্তৰ-পূব শান্তিৰ মাধ্যমেৰে উন্নয়নৰ জখলাৰে বগাই গৈ আছে,‘-এই দাবী শ্বাহৰ।
শ্বাহৰ মতে দেশক শান্তি শৃংখলা আৰু সুৰক্ষা প্ৰদান কৰাটোৱেই ভাৰতীয় জনতা পাৰ্টীৰ অন্যতম লক্ষ্য।
বিৰোধী দল-সংগঠনে মোদী চৰকাৰ শাসনলৈ অহাৰ পাছৰে পৰা সন্ত্ৰাসবাদৰ প্ৰকোপ বৃদ্ধি পোৱা আৰু অসমৰ যুৱকসকল আলফালৈ যোৱা ইত্যাদি কাৰ্য্যসমূহ বেছিকৈ হ’বলৈ ধৰা বুলি দাবী কৰাৰ সময়তে বিজেপিৰ ৰাষ্ট্ৰীয় সভাপতিজনৰ এই মন্তব্যই বিশেষ তাৎপৰ্য্য বহন কৰিছে।
