শিৱসাগৰ জিলাৰ উপায়ুক্ত ড০ এছ লক্ষ্মণনৰ অধ্যক্ষতাত আজি উপায়ুক্ত কাৰ্য্যালয়ত অনুষ্ঠিত এখন সভাত সাম্ভাব্য বানপানীৰ পৰিপ্ৰেক্ষিতত জিলাখনৰ বিভিন্ন বিভাগৰ প্ৰস্তুতি সম্পৰ্কে বিস্তৃতভাৱে আলোচনা কৰা হয়।
সভাত উপায়ুক্ত গৰাকীয়ে বানপানীৰ পৰিস্থিতি উদ্ভৱ হলে তেনে পৰিস্থিতি মুকবিলা কৰাৰ বাবে জিলাখনৰ দুৰ্যোগ ব্যৱস্থাপনা প্ৰাধিকৰণ, ৰাজহ চক্ৰ বিষয়া পৰ্যায়ত, বিভিন্ন চৰকাৰী বিভাগ, আৰক্ষী, অৰ্ধসামৰিক আদি তৰফৰ পৰা কেনেধৰণৰ ব্যৱস্থা গ্ৰহণ কৰা হ’ব এই সম্পৰ্কে বুজ লয়।
এই সন্দৰ্ভত তেওঁ সংশ্লিষ্ট সকলো বিভাগক অহা ৮ মাৰ্চৰ ভিতৰত বিতং প্ৰতিবেদন দাখিল কৰিবলৈ কোৱাৰ লগতে বানপানীৰ দৰে দুৰ্যোগৰ সময়ত সকলো বিভাগক সু-সমন্বয় ৰক্ষা কৰি তৎপৰতাৰে কাম কৰি যাবলৈ পৰামৰ্শ দিয়ে। সভাত বিগত বৰ্ষত বানপানী, জুই লগা, বজ্রপাত পৰা আদি প্ৰাকৃতিক দুৰ্যোগৰ ফলত হোৱা ক্ষতিসাধনৰ বাবে দুৰ্যোগ ব্যৱস্থাপনা প্ৰাধিকৰণৰ তৰফৰ পৰা উত্থাপন কৰা আৰ্থিক সাহায্য আদিৰ প্ৰতিবেদন অনুমোদন কৰা হয়।
অতিৰিক্ত জিলা উপায়ুক্ত মুন গগৈয়ে জানিবলৈ দিয়া মতে বান পৰিস্থিতিৰ সময়ত হ’ব পৰা যিকোনো দুৰ্ঘটনাৰ মোকবিলা কৰাৰ বাবে এন ডি আৰ এফৰ এটা বৃহৎ দল জিলাখনলৈ অনাৰ বাবে ইতিমধ্যে ব্যৱস্থা কৰা হৈছে। তেওঁ লগতে বানপানীৰ দৰে প্ৰাকৃতিক দুৰ্যোগৰ সময়ত যোগাযোগ কৰাৰ বাবে সক্রিয় কৰি ৰখা নিয়ন্ত্ৰণ কক্ষ (District Emergency Operation Centre)ৰ দূৰভাষ নম্বৰ ১০৭৭ (ট’ল ফ্ৰী), ০৩৭৭২-২২৩৩৯৭, ৮৪৭১৮৬৪৩৫৫-ৰ বিষয়ে সভাত জানিবলৈ দিয়ে।
