ছয় বাৰৰ বিশ্ব কাপ বিজয়ী বক্সাৰ মেৰীকমৰ জীৱন ভিত্তিক এখন তথ্যচিত্ৰ ক্ৰীড়াপ্ৰেমীসকলে অতি সোনকালেই টিভি স্ক্ৰীনত দেখিবলৈ পাব।
কানাডাৰ আন্না ছাৰ্কিছিয়ান আৰু আমিশা যোশীয়ে দীৰ্ঘদিন ধৰি ‘বক্সিং সম্ৰাজ্ঞী’গৰাকীৰ জীৱনৰ আধাৰত এখন তথ্যচিত্ৰ নিৰ্মাণৰ কাম কৰি আহিছে। এতিয়া তেওঁলোকে তথ্যচিত্ৰখনৰ কাম সম্পূৰ্ণ কৰি তুলিছে।
জানিব পৰা মতে, এমাজন প্ৰাইম ভিডিঅ’ তথা ইউ টিউবত এই তথ্যচিত্ৰখন অহা ১২ মাৰ্চত মুকলি কৰা হ’ব।
উল্লেখযোগ্য যে ২০০৫ চনৰ পৰাই আন্না আৰু আমিশাই কেইবাবাৰো ভাৰত ভ্ৰমণ কৰিছে আৰু মেৰীকমৰ প্ৰস্তুতি শিবিৰসমূহত উপস্থিত থাকি খেলুৱৈগৰাকীৰ সৱিশেষ অনুসৰণ কৰি গৈছে। ২০১৬ চনত মুম্বাই আন্তৰ্জাতিক চলচ্চিত্ৰ মহোৎসৱত তেওঁলোকৰ তথ্যচিত্ৰ ‘উইথ ডিছ ৰিং’ প্ৰদৰ্শন কৰা হয়।
মেৰীকমৰ ক্ৰীড়া জীৱনৰ অন্যতম ‘টাৰ্ণিং পইন্ট’ হিচাপে বিবেচিত হৈছে ২০১২ চনৰ লণ্ডন অলিম্পিক। মেৰীকমে সেই অলিম্পিকত পদক পাব বুলি বহুতেই অনুমান কৰিব পৰা নাছিল। কিন্তু সকলোকে চমকিত কৰি দেশৰ প্ৰথমগৰাকী মহিলা বক্সাৰ হিচাপে মেৰী কমে পদক জয় কৰিবলৈ সক্ষম হৈছিল।
