কাৰ্বি আংলং স্বায়ত্তশাসিত পৰিষদৰ উদ্যোগত অনুষ্ঠিত হৈ অহা চি ই এম গ’ল্ড কাপ ফুটবল প্ৰতিযোগিতাখন আজিৰ পৰা আৰম্ভ হ’ব। এইবাৰৰ প্ৰতিযোগিতাত বিদেশৰ আগশাৰীৰ ক্লাবেও অংশ গ্ৰহণ কৰিব। আজিৰ পৰা আৰম্ভ হ’ব লগীয়া প্ৰতিযোগিতাখনৰ মেচসমূহ ডিফুৰ নৱনিৰ্মিত ‘কাছা ষ্টেডিয়াম’ত অনুষ্ঠিত হ’ব বুলি আয়োজকে জনায়।
প্ৰতিযোগিতাখনৰ বিষয়ে তথা প্ৰস্তুতি সম্পৰ্কে জনোৱাৰ উদ্দেশ্যে আয়োজকে মঙলবাৰে কাছা ষ্টেডিয়ামৰ প্ৰেক্ষাগৃহত এখন সংবাদমেল অনুষ্ঠিত কৰে। সংবাদমেলত মুখ্য কাৰ্যবাহী সদস্য তুলিৰাম ৰংহাঙে কয় যে এইবাৰ প্ৰতিযোগিতা আন্তঃৰাষ্ট্ৰীয় ভিত্তিত অনুষ্ঠিত হ’ব আৰু ভূটান, শ্ৰীলংকা, নেপালৰ ক্লাবে প্ৰতিযোগিতাত অংশ লব।
প্ৰতিযোগিতাখনত নেপালৰ চাংকাটা ক্লাব, ভূটানৰ থিম্ফু চিটী এফ চি আৰু শ্ৰীলংকাৰ জাভা লেণ্ড এছ ছিয়ে অংশগ্ৰহণ কৰিব। ইয়াৰ উপৰি কলকাতাৰ আগশাৰীৰ ক্লাবেও প্ৰতিযোগিতাখনত প্ৰতিদ্বন্দ্বিতা আগবঢ়াব বুলি জানিবলৈ দিয়ে।
আনহাতে সম্পূৰ্ণ প্ৰতিযোগিতাখন ফ্লাড লাইটৰ তলত অনুষ্ঠিত হ’ব। আৰু চূড়ান্ত খেলখনৰ বাবে অহা ১৪ মাৰ্চৰ দিনটো ঠিৰাং কৰা হৈছে বুলি ৰংহাঙে জনায়।
ইফালে আজি প্ৰতিযোগিতাৰ উদ্বোধনী খেলত অংশ ল’ব আছাম ৰাইফল্ছ শ্বিলং আৰু বি টি এ ডিৰ দৈমালু ক্লাবে। অসম পুলিচ ব্লুজ, গোৱাৰ চালগাওকাৰ এফ চি, য়ুনাইটেড ছিকিম এফ চি, ত্ৰিপুৰাৰ জামপুইজালা, মণিপুৰৰ য়ু পি এ এ দলৰ লগতে নাগালেণ্ড আৰু মেঘালয়ৰ দলেও এইবাৰৰ প্ৰতিযোগিতাত অংশ গ্ৰহণ কৰিব।
আজি সন্ধিয়া ৬ বজাত খেল অনুষ্ঠিত হ’ব। প্ৰতিযোগিতাৰ উদ্বোধনী অনুষ্ঠানত গীত পৰিৱেশন কৰিব ইণ্ডিয়ান আইডলৰ বিজয়ী সুৰভী দেৱবাৰ্মাই।
