ড০ টি আও জন্ম শতবাৰ্ষিকী কমিটিৰ উদ্যোগত গুৱাহাটীত অনুষ্ঠিত হৈ থকা দ্বিতীয়সংখ্যক টি আও উত্তৰ-পূব আন্তঃৰাষ্ট্ৰীয় এন ই চি (অনূৰ্ধ্ব ২১) গ’ল্ড কাপৰ চূড়ান্ত খেলত আজি মুখামুখি হ’ব মেঘালয় আৰু মিজোৰাম।
প্ৰতিযোগিতাৰ প্ৰথম ছেমিফাইনেলত মেঘালয়ে ছিকিমক ২-০ গ’লৰ ব্যৱধানত পৰাস্ত কৰি ফাইনেলত প্ৰৱেশ কৰে। ছাই নিউ ফিল্ডত অনুষ্ঠিত মেচখনত মেঘালয়ৰ হৈ বেল্টন লাৰটাঙে ৩৯ মিনিটত আৰু খেলৰ অতিৰিক্ত সময়ত ৰ’নাল্ড নংলাইটে বিজয়সূচক গ’ল দুটা প্ৰদান কৰে।
আনখন ছেমিফাইনেলত মিজোৰামে অৰুণাচল প্ৰদেশক ৫-০ গ’লৰ বৃহৎ ব্যৱধানত পৰাস্ত কৰি ফাইনেললৈ অগ্ৰসৰ হয়। মিজোৰামৰ হৈ পি চি হালৰিয়াটপুইয়াই দুটা, এফ হালমেণ্টটুৱাংগা, ফ্লেৰিয়াছ লালৰুৱাটকিমা আৰু লাল ৰেম ৰুৱাটাই এটাকৈ গ’ল কৰে।
ইফালে, উদ্যোক্তাই জানিব দিয়া মতে আজি ছাই নিউ ফিল্ডত বিয়লি ৫.৩০ বজাৰ পৰা চূড়ান্ত খেলখন অনুষ্ঠিত হ’ব। প্ৰতিযোগিতাৰ সামৰণি অনুষ্ঠানত উপস্থিত থাকিব অসমৰ ৰাজ্যপাল জগদীশ মুখি আৰু মুখ্য মন্ত্ৰী সৰ্বানন্দ সোণোৱাল।
তদুপৰি, খেলৰ অন্তত কণ্ঠশিল্পী ৰাকেশ ৰিয়ান আৰু জনপ্ৰিয় ব্ৰেণ্ড হাৰিকেন গাৰ্লছে সংগীতানুষ্ঠান পৰিৱেশন কৰিব বুলিও আয়োজক সন্থাই জানিবলৈ দিয়ে।
