অসম সন্তান ৰীমা দাসে আন্তঃৰাষ্ট্ৰীয় পৰ্যায়ত আকৌ এবাৰ নিজৰ কৃতিত্বৰ স্বাক্ষৰ বহন কৰিবলৈ সক্ষম হৈছে। চলচ্চিত্ৰ পৰিচালক ৰীমা দাসলৈ এইবাৰ ক্লীভলেণ্ড আন্তঃৰাষ্ট্ৰীয় চলচ্চিত্ৰ মহোৎসৱে আগবঢ়াইছে ‘ছামৱান টু ৱাটচ’ সন্মান।
‘ভিলেজ ৰকষ্টাৰ’ ছবিৰে চলচ্চিত্ৰ জগতত খলকনি তুলিবলৈ সক্ষম হোৱা ৰীমা দাসক চলচ্চিত্ৰ পৰিচালনাৰে আন্তঃৰাষ্ট্ৰীয় পৰ্যায়ত বিশেষ প্ৰতিষ্ঠা লাভ কৰাৰ বাবে ৪৩সংখ্যক ক্লীভলেণ্ড আন্তঃৰাষ্ট্ৰীয় চলচ্চিত্ৰ মহোৎসৱ কৰ্তৃপক্ষই এই সন্মান আগবঢ়াইছে।
অহা ২৭ মাৰ্চৰ পৰা সাত এপ্ৰিললৈ ডাউন-টাউন ক্লীভলেণ্ডৰ চিটী চিনেমা টাৱাৰত অনুষ্ঠিত হ’বলগীয়া ক্লীভলেণ্ড আন্তঃৰাষ্ট্ৰীয় চলচ্চিত্ৰ মহোৎসৱত ৰীমা দাসৰ দুখনকৈ ছবিও প্ৰদৰ্শিত হ’ব। ৰীমা দাস পৰিচালিত ছবি ‘ভিলেজ ৰকষ্টাৰ্ছ’ আৰু ‘বুলবুল কেন ছিং’ ছবি দুখন উক্ত চলচ্চিত্ৰ মহোৎসৱত প্ৰদৰ্শিত হ’ব।
বাৰদিনীয়াকৈ অনুষ্ঠিত হ’বলগীয়া এই আন্ত:ৰাষ্ট্ৰীয় চলচ্চিত্ৰ মহোৎসৱখনত বিশ্বৰ বিভিন্ন প্ৰান্তৰ মুঠ ৬০০খন চলচ্চিত্ৰ প্ৰদৰ্শিত হ’ব।
ক্লীভলেণ্ড আন্তঃৰাষ্ট্ৰীয় চলচ্চিত্ৰ মহোৎসৱৰ পৰা এই সনমান লাভ কৰি পৰিচালক ৰীমা দাস উৎসাহিত হৈছে। তদুপৰি, ৰীমাৰ গুণমুগ্ধসকলেও পৰিচালকগৰাকীৰ এই সাফল্যত উৎফুল্লিত হৈ পৰিছে।
