অৰূপ মান্না পৰিচালিত ‘আমৃত্যু’ চলচ্চিত্ৰখনে অসমীয়া চলচ্চিত্ৰ জগতলৈ কঢ়িয়াই আনিছে এক সন্মান। বেংগালুৰু আন্তঃৰাষ্ট্ৰীয় চলচ্চিত্ৰ মহোৎসৱত ‘আমৃত্যু’ৱে বিশেষ জুৰিৰ বঁটা লাভ কৰিছে।
যোৱা ১১ ফেব্ৰুৱাৰিৰ পৰা ২৮ ফেব্ৰুৱাৰিলৈকে বেংগালুৰুত এই চলচ্চিত্ৰ মহোৎসৱ অনুষ্ঠিত হৈছিল।
বিশিষ্ট গল্পকাৰ শিৱানন্দ কাকতিৰ ‘আমৃত্যু অমৃত’ নামৰ গল্পৰ আধাৰত নিৰ্মিত চলচ্চিত্ৰখনৰ চিত্ৰ নাট্য-পৰিচালনাৰ লগতে চিত্ৰ গ্ৰহণো কৰিছে অৰূপ মান্নাই।
ত্ৰিনয়ন মিডিয়া ফাউণ্ডেশ্যনৰ হৈ নৱমিকা বৰঠাকুৰে প্ৰযোজনা কৰা ছবিখনৰ মুখ্য চৰিত্ৰত অভিনয় কৰিছে হেমন্ত গগৈয়ে। তদুপৰি, ছবিৰ বিভিন্ন চৰিত্ৰত অভিনয় কৰিছে অজয় ডেকা, সপোনটি বৰদলৈ, কল্প বৰা আৰু শিশু শিল্পী ঔম কাশ্যপে।
নব্বৈৰ দশকত বিদ্ৰোহী সংগঠনবোৰত যোগদান কৰা একাংশ অসমীয়া ডেকাৰ মানসিক সংঘাতৰ ছবি তুলি ধৰা চলচ্চিত্ৰখনত সংগঠনৰ নীতি-আদৰ্শ মানি হত্যালীলাৰ নীৰৱ দৰ্শক হৈ ৰোৱা এজন যুৱকৰ মানসিক অন্তৰ্দ্বন্দ্বৰ কথা দাঙি ধৰা হৈছে।
‘আমৃত্যু’ৱে ইতিমধ্যে কলকাতা, কেৰালা, ঔৰংগাবাদ, ভুৱনেশ্বৰ, ঢাকা আদি আন্তঃৰাষ্ট্ৰীয় চলচ্চিত্ৰ মহোৎসৱত চলচ্চিত্ৰ প্ৰেমীৰ প্ৰশংসা লাভ কৰিবলৈ সক্ষম হৈছিল। ছবিখনে দ্বিতীয় গুৱাহাটী আন্তঃৰাষ্ট্ৰীয় চলচ্চিত্ৰ মহোৎসৱতো শ্ৰেষ্ঠ ছবিৰ (গ’ল্ডেন কেমেৰা) বঁটা লাভ কৰিছিল।
