নিবনুৱা সমস্যাক অন্যতম প্ৰধান ইচ্ছু হিচাপে লৈ শাসনৰ গাদীত বহা নৰেন্দ্ৰ মোদী নেতৃত্বাধীন বিজেপি চৰকাৰৰ দিনত দেশত উদ্বেগজনক ভাৱে বৃদ্ধি পাইছে নিবনুৱাৰ সংখ্যা।
সংবাদ প্ৰতিষ্ঠান ৰয়টাৰত প্ৰকাশ পোৱা এক বাতৰি মতে চলিত বৰ্ষৰ ফেব্ৰুৱাৰি মাহলৈকে ভাৰতত নিবনুৱাৰ হাৰ ৭.২ শতাংশলৈ বৃদ্ধি পাইছে। ২০১৬ চনৰ ছেপ্টেম্বৰ মাহৰ পৰা এইয়া হৈছে আটাইতকৈ সৰ্বোচ্চ হাৰ। এবছৰ পূৰ্বে অৰ্থাৎ ২০১৮ চনৰ ফেব্ৰুৱাৰিত এই হাৰ আছিল ৫.৯ শতাংশ।
মুম্বাইস্থিত চেন্তাৰ ফৰ মনিটৰিং ইণ্ডিয়ান ইক’নমি (CMIE) নামৰ এক প্ৰতিষ্ঠানে যুগুত কৰা এক প্ৰতিবেদনত এই তথ্য প্ৰকাশ পাইছে।
প্ৰতিষ্ঠানটোৰ মুৰব্বী মহেশ ভ্যাসে ‘ৰয়টাৰ’ক জনোৱা মতে দেশত চাকৰি সন্ধানি প্ৰাৰ্থীৰ সংখ্যা কমিছে যদিও নিবনুৱাৰ সংখ্যা কিন্তু বৃদ্ধি পাব ধৰিছে। যোৱা ফেব্ৰুৱাৰি মাহত ভাৰতত প্ৰায় ৪০০ নিযুত লোক চাকৰিত নিযুক্ত আছিল, ইয়াৰ বিপৰীতে এবছৰ পূৰ্বে এই সংখ্যা আছিল ৪০৬ নিযুত, তেওঁ কয়।
উল্লেখযোগ্য যে CMIE য়ে যুগুত কৰা এই সংখ্যাক বহু অৰ্থনিতিবিদে চৰকাৰে প্ৰকাশ কৰা নিবনুৱাৰ সংখ্যাতকৈ অধিক বিশ্বাসযোগ্য বুলি মন্তব্য কৰিছে।
দেশত হ’বলগীয়া লোকসভা নিৰ্বাচনৰ প্ৰাকক্ষণত প্ৰকাশ পোৱা উক্ত প্ৰতিবেদনে মোদী চৰকাৰক নিশ্চয়কৈ অস্বস্তিত পেলাব।
আনহাতে যোৱা জানুৱাৰি মাহত CMIE য়ে প্ৰকাশ কৰা এক প্ৰতিবেদনৰ মতে বৰ্তমানৰ চৰকাৰে গ্ৰহণ কৰা বিমুদ্ৰাকৰণ আৰু জি এছ টি নিতীৰ পৰৱৰ্তী পৰ্যায়ত ২০১৮ চনত ভাৰতত প্ৰায় ১১ নিযুত লোকে চাকৰি হেৰুৱাৰ লগতে কেইবা নিযুত ক্ষুদ্ৰ ব্যৱসায়ী বেয়াকৈ ক্ষতিগ্ৰস্ত হৈছে।
