মঙলদৈ অসামৰিক চিকিৎসালয়ত শনিবাৰে নিশা অচিনাক্ত দুস্কৃতিকাৰীয়ে কৰ্তব্যৰত চিকিৎসক আৰু কৰ্মচাৰীক আক্ৰমণ কৰাৰ লগতে হাস্পাতালখনৰ যন্ত্ৰপাতি তথা নথিপত্ৰ লণ্ডভণ্ড কৰি ৰাজহুৱা সম্পত্তি বিনষ্ট কৰে।
কৰ্তব্যত থকা হাস্পাতালখনৰ কৰ্মচাৰী জানিব দিয়া অনুসৰি নিশা প্ৰায় ১০ বজাত এটা প্ৰায় ১৫ জনীয়া যুৱকৰ দলে বাইক দুৰ্ঘটনাত ভৰিত আঘাত পোৱা সুব্ৰত দেবনাথ (২৬) নামৰ এজন ৰোগীক লৈ আহে।
প্ৰাথমিক চিকিৎসা প্ৰদানৰ পাছত ৰোগীজনক হাস্পাতাল কৰ্তৃপক্ষই যেতিয়া গুৱাহাটী চিকিৎসা মহাবিদ্যালয় ও হাস্পাতাললৈ প্ৰেৰণৰ প্ৰস্তুতি চলাইছিল, তেনে সময়তে ৰোগীজনক লৈ অহা যুৱকৰ দলটোৱে প্ৰক্ৰিয়াটোত বিলম্ব হোৱাৰ অভিযোগ তুলি কৰ্তব্যত থকা কৰ্মচাৰী আৰু গৃহৰক্ষী জোৱানৰ সৈতে তৰ্কত লিপ্ত হৈছিল।
মাতাল অৱস্থাত থকা তেওঁলোকৰে একাংশই চিকিৎসক আৰু কৰ্মচাৰীক উদ্দেশ্যি অশ্লীল শব্দ প্ৰয়োগ কৰাৰ লগতে কৰ্তব্যৰত চিকিৎসকৰ চকী,মেজ আৰু আন চিকিৎসাৰ যন্ত্ৰপাতি লণ্ডভণ্ড কৰাৰ উপৰি কৰ্তব্যৰত চিকিৎসকৰ প্ৰৱেশদ্বাৰত থকা আইনা ভঙাৰ লগতে চিকিৎসকক আক্ৰমণ কৰে।
চিকিৎসা বিষয়াজনক উদ্ধাৰ কৰাৰ বাবে অহা কৰ্মচাৰী তথা গৃহৰক্ষী জোৱানকো দলটোৱে প্ৰহাৰ কৰে। আক্ৰমণৰ ফলত চতুৰ্থ বৰ্গৰ কৰ্মচাৰী মুকুট স্বৰ্ণকাৰ আঘাতপ্ৰাপ্ত হয়।
ইয়াৰ প্ৰায় আধা ঘন্টা পাছত যেতিয়া আৰক্ষী উপস্থিত হয় আৰক্ষীয়ে কৰায়ত্ত কৰিবলৈ চেষ্টা কৰোতে আহত হোৱা এজনৰ বাহিৰে বাকীকেইজন পলাই যাবলৈ সক্ষম হয়। আৰক্ষীৰ হাতত ধৃত যুৱকজনক মঙলদৈ আৰক্ষী থানাৰ অন্তৰ্গত ১নং বেজপাৰা গাঁৱৰ কুসুম ডেকা(৩৫) বুলি চিনাক্ত কৰা হৈছে।
অৱশ্যে, তেওঁ লগত অহা যুৱকেইজনক চিনাক্ত কৰিবলৈ অস্বীকাৰ কৰি ব্যক্ত কৰে যে তেওঁলোকে গুৱাহাটীৰ পৰা দৰা যাত্ৰী হিচাপে এখন বিয়ালৈ আহিছিল।
আনহাতে, সংবাদমাধ্যমৰ আগত ঘটনাৰ কথা ব্যক্ত কৰি হাস্পাতালখনৰ কৰ্মচাৰী আৰু উপস্থিত ওচৰৰ ৰাইজে মাত্ৰ কেইশ মিটাৰমান আঁতৰত থকা মঙলদৈ সদৰ আৰক্ষী থানাৰ পৰা আৰক্ষী ঘটনাস্থলীত পলমকৈ উপস্থিত হোৱাৰ অভিযোগ উত্থাপন কৰে।
চিকিৎসা বিষয়া ডাঃ বিষ্ণু ডেকাইও লগতে শেহতীয়াভাৱে এনেধৰণে নিশাৰ ভাগত বৃদ্ধি পোৱা কৰ্মচাৰীৰ প্ৰতি ভাবুকি আৰু সুৰক্ষাৰ বিষয়ত গভাৰ চিন্তা ব্যক্ত কৰে।
