আগন্তুক বাৰিষা বতৰৰ প্ৰতি দৃষ্টি ৰাখি মাজুলী জিলা প্ৰশাসনে জিলাখনত সম্ভাব্য বান পৰিস্থিতিৰে মোকাবিলা কৰিব পৰাকৈ সম্ভৱপৰ সকলো ধৰণৰ প্ৰস্তুতি আৰম্ভ কৰিছে। এই সন্দৰ্ভত আজি মাজুলীৰ উপায়ুক্ত তথা জিলা দুৰ্যোগ প্ৰশমন প্ৰাধিকৰণ (ডি ডি এম এ) দেৱপ্ৰসাদ মিশ্ৰই জিলা বান-সাহায্য সমিতিৰ এখন আগতীয়া প্ৰস্তুতিমূলক বৈঠক অনুষ্ঠিত কৰে।
উপায়ুক্তৰ সভাকক্ষত আয়োজিত এই বৈঠকত অতিৰিক্ত উপায়ুক্ত তথা ডি ডি এম এৰ মুখ্য কাৰ্যবাহী বিষয়া চিন্ময় নাথ, আৰক্ষী অধীক্ষক হীতেশ চন্দ্ৰ ৰায়, ৰাজহ চক্ৰ বিষয়া অজিত কুমাৰ শৰ্মাৰ লগতে ডি ডি এম এৰ তথা জিলা বান সাহায্য সমিতিৰ সদস্য হিচাপে থকা জলসম্পদ, স্বাস্থ্য, গড়কাপ্তানী, জনস্বাস্থ্য কাৰিকৰী, কৃষি, পশু চিকিৎসা আৰু পশুপালন, খাদ্য আৰু অসামৰিক যোগান আদি বিভিন্ন বিভাগৰ মূৰব্বী বিষয়াসকলে অংশগ্ৰহণ কৰে।
সভাত উপায়ুক্তই সকলো বিভাগকে আগন্তুক বাৰিষাৰ সময়ছোৱাত মাজুলী জিলাবাসীক সকাহ দিব পৰাকৈ আৰু সাম্ভাব্য যিকোনো বানজনিত প্ৰতিকূল পৰিস্থিতিৰে যথোচিত ভাৱে মোকাবিলা কৰিব পৰাকৈ নিজা নিজা আগতীয়া পৰিকল্পনা অহা ২০ মাৰ্চৰ ভিতৰতে যুগুত কৰি ডি ডি এম এৰ ওচৰত দাখিল কৰিবলৈ নিৰ্দেশ দিয়ে।
তদুপৰি, জিলাখনত থকা মঠাউৰিসমূহ আগন্তুক ১৫ দিনৰ ভিতৰতে জৰীপ কৰি মঠাউৰিৰ স্পৰ্শকাতৰ অংশসমূহ চিনাক্ত কৰি প্ৰয়োজনীয় আগতীয়া প্ৰতিকাৰমূলক ব্যৱস্থা গ্ৰহণৰ বাবে উপায়ুক্তই জলসম্পদ বিভাগক নিৰ্দেশ দিয়ে।
