আগন্তুক লোকসভা নিৰ্বাচনক কেন্দ্ৰ কৰি পুনৰ মিত্ৰতালৈ অহাৰ পিছত আজি পোন প্ৰথমবাৰৰ বাবে অসম গণ পৰিষদ আৰু ৰাজ্যিক বিজেপিৰ নেতৃত্ব একেলগে বৈঠকত মিলিত হ’ল। অগপৰ আমবাৰীস্থিত মুখ্য কাৰ্যালয়ত অনুষ্ঠিত হয় এই বৈঠক।
এই উদ্দেশ্যে অসম গণ পৰিষদৰ মুখ্য কাৰ্যালয়ত উপস্থিত হয় বিজেপিৰ ৰাজ্যিক সভাপতি ৰণজিৎ দাস, মন্ত্ৰী হিমন্ত বিশ্ব শৰ্মা, মহেন্দ্ৰ সিং আৰু সাংসদ কামাখ্যা প্ৰসাদ তাছা। অগপৰ সভাপতি অতুল বৰা, কাৰ্যকৰী সভাপতি কেশৱ মহন্ত, ফণীভুষণ চৌধুৰী, ৰমেন্দ্ৰ নাৰায়ণ কলিতা, মনোজ শইকীয়া আদি উপস্থিত থকা উক্ত বৈঠকত দল দুটাই লোকসভা নিৰ্বাচনকলৈ আলোচনাত বহে।
অগপ কাৰ্যালয়ত প্ৰৱেশ কৰিয়ে দলটোৰ তথ্য ও প্ৰচাৰ বিভাগৰ সম্পাদক মনোজ শইকীয়াৰ আগত মন্ত্ৰী হিমন্তই কয়, ‘বহু দিনৰ পিছত আহিছোঁ’! প্ৰসংগক্ৰমে উল্লেখ কৰিব পাৰি যে কেইবছৰ মান পূৰ্বে হিমন্ত বিশ্ব শৰ্মাই ব্যংগ কৰি অগপ কাৰ্যালয় এসময়ত বিবাহভৱন হ’ব বুলি টিপ্পনি মাৰিছিল।
অৱশ্যে আজিৰ আলোচনাৰ অন্তত বাক চতুৰ মন্ত্ৰীজনে পূৰ্বৰ সুৰ সলাই অগপ নেতৃত্বক বিজেপি কাৰ্যালয়লৈ নিমন্ত্ৰন জনায়। তেওঁ কয়, ‘কাইলৈ পুৱা অগপ নেতৃত্ব চাহ একাপ খাবলৈ বিজেপি কাৰ্যালয় যাব। তাতে দুয়োটা দলৰ নেতৃত্বই যুটীয়াভাৱে সংবাদমেল সম্বোধন কৰিব।’
আনহাতে আলোচনাৰ অন্তত অতি নিৰ্লজ্জ ভাবে অতুল বৰাই কয়, ‘মিশ্ৰিত প্ৰতিক্ৰিয়া হৈছে সকলোৰে মাজত। সময়ত সকলো ঠিক হৈ যাব’।
আজিৰ সভাত আগন্তুক নিৰ্বাচনত দল দুটাই কেনেদৰে অৱতীৰ্ণ হ’ব সেই সম্পৰ্কেও আলোচনা হৈছিল বুলি উল্লেখ কৰি বৰাই লগতে কয়, ‘অসমৰ জনসাধাৰণে বুজি পাইছে আমি কিয় আহিলোঁ মিত্ৰতালৈ। কংগ্রেছক যিকোনো প্ৰকাৰে পৰাস্ত কৰিব লাগিব সেয়েহে আমি মিত্ৰতাত আহিছোঁ।’
