দেশত বাল্য বিবাহ ৰোধৰ বাবে বিভিন্ন ধৰণে প্ৰচেষ্টা অৱ্যাহত থকাৰ সময়তে শুকুৰবাৰে বাইহাটা চাৰিআলি অঞ্চলৰ পৰা বাল্য বিবাহৰ ভূক্তভোগী এগৰাকী নাবালিকাক উদ্ধাৰ কৰে দৰং জিলা শিশু কল্যাণ সমিতিয়ে।
ৰশ্মি ৰেখা দেৱী নামৰ এগৰাকী শিশু কল্যাণ সমিতিৰ সদস্যই নৰ্থ-ইষ্ট নাওক জনোৱা মতে আৰক্ষীয়ে ভূক্তভোগী নাবালিকা গৰাকীক তেওঁলোকৰ আগত হাজিৰ কৰায় আৰু নাবালিকা গৰাকীৰ ভাষ্যৰ ভিত্তিত তেওঁক পৰিয়ালৰ হাতত গতাই দিয়া হয়।
আনহাতে, ছিপাঝাৰ আৰক্ষীয়ে দৰা ৩১ বছৰীয়া নৰেশ ডেকাৰ বিৰুদ্ধে বাল্য বিবাহ প্ৰতিৰোধী আইন,২০০৬ ৰ অধীনত ১৭৬/১৯ য়ু এছ ৯/১০ নম্বৰত এক গোচৰ ৰুজু কৰি আদালতত হাজিৰ কৰিছে। অভিযুক্ত নৰেশ ডেকা ছিপাঝাৰ আৰক্ষী থানাৰ অন্তৰ্গত দেৱনন্দ গাঁওৰ শিশুৰাম ডেকাৰ পুত্ৰ।
আদালতে অভিযুক্ত নৰেশ ডেকাক ২৭ মাৰ্চলৈ ন্যায়িক জিম্মালৈ প্ৰেৰণ কৰিছে।
দৰঙৰ এছ পি অমৃত কুমাৰ ভূঞাই অভিযুক্তক আইন অনুসৰি উপযুক্ত শাস্তি বিহা হ’ব বুলি উল্লেখ কৰি বিয়াৰ সময়ত ছোৱালীজনীৰ বয়স প্ৰয়োজনীয় বয়সতকৈ ৬ মাহ কম আছিল বুলি কয়।
উল্লেখযোগ্য যে, বুধবাৰে নিশা দৰং জিলাৰ শিশু কল্যাণ সমিতিৰ সচিৱ ৰাজেন চন্দ্ৰ দাস, সদস্য পুৰ্ণিমা গোস্বামী, ৰশ্মিৰেখা দেৱী আৰু ৰমেশ শইকীয়াৰে গঠিত এটা দলে ছিপাঝাৰ আৰক্ষীৰ সহযোগত নাবালিকা গৰাকীক উদ্ধাৰ কৰে।
ছিপাঝাৰ আৰক্ষীয়ে অঞ্চলটোৰ জনসাধাৰণক বাল্য বিবাহ ৰোধৰ ক্ষেত্ৰত কঠোৰ হোৱাৰ বাবে আহ্বান জনাই আৰক্ষীয়েও এনে আইন বহিৰ্ভূত কাৰ্য্যৰ ক্ষেত্ৰত কঠোৰ নীতি ল’ব বুলি বুলি কয়।
